Kryeministria harxhon edhe 62 mijë euro për lapsa kimikë, fletore e shërbime për shtypje
Zyra e Kryeministrit të Kosovës, Ramush Haradinaj do të furnizohet me lapsa kimikë, fletore, fasikëll me palosje, qese letre, emblemë shteti dhe kopertina për mirënjohje e certifikatë. Krejt këto buxhetit të shtetit më të varfër në rajon do t’i kushtojnë hiç më pak se 6 mijë e 200 euro. Përveç kësaj Kryeministria ka nënshkruar edhe tender tjetër për shërbimet e shtypjes me vlerë prej 56 mijë e 200 euro, si dhe furnizim me kimikë me vlerë 900 euro, shkruan Agjencia e Lajmeve FaktePlus.
Tenderi “furnizim me materiale të ndryshme për zyrë sipas nevojave të kabinetit” do të jetë i hapur deri më 2 maj, shkruan Agjencia e Lajmeve FaktePlus.
Sipas dosjes së tenderit, Zyra e Kryeministrit të Kosovës po kërkon 250 fletore me dimensionin 150 mm x 220 mm. E këto fletore duhen të jenë me vija dhe në anën e djathtë duhet të ketë të shkruar : Memo Nr_____ , si dhe Data: / / /
Kopertinën fletoret duhet ta kenë të veshur me material që është imitim lëkure termike, ndërsa në ballinë duhet të ketë varëse për laps, xhep për telefon, vizitë-karta dhe logoja e Qeverisë.
Po ashtu, kërkohen edhe 500 copë fletore notes me dimension 125mm x 185 mm, brendia e të cilave duhet jetë 100 fletë color, fletët pa vija 80 gr, dhe në çdo fletë duhet të jetë logoja e Qeverisë e njëjtë me atë të kopertinës.
Zyrës së Kryeministrit të Kosovës po i duhet edhe 150 lapsa kimikë të zi e që çelen me përdredhje. Edhe këta lapsa kimikë duhet të kenë logon e Kryeministrisë.
Mirëpo përveç kimikëve që çelen për përdredhje, Zyra e Kryeministrit ka kërkuar edhe për 200 lapsa kimikë tjerë, çelja e të cilëve është me shtypje.
Kërkesat e Kryeministrisë nuk mbarojnë me kaq. Ky institucion po planifikon të blejë edhe një lloj tjetër të lapsave kimikë. Tashmë janë porositur edhe 150 lapsa me kuti, e të cilët po ashtu duhet të jenë me ngjyrë të zezë.
Zyra e Kryeministrit me këtë tender po kërkon të furnizohet edhe me 100 fasikëlla me letër blumarino, matt dhe me ngjyrë të kaltër të mbyllur. Këto fasikëlla duhet të jenë të formatit A4.
Kurse qese letre janë porositur 450 copë, emblemë shteti 500 copë si dhe 100 kopertina për mirënjohje dhe certifikatë.
Ndërkaq, tenderi për shërbimet e shtypjes i është dhënë kompanisë “Dukagjini” Sh.P.K. me vlerë 56 mijë e 200 euro.
Agjencia e Lajmeve FaktePlus ka shkruar edhe për tenderin e kimikëve që është nënshkruar ditë më parë. LEXO KETU.