Tahiri: Nuk është hera e parë që Albin Kurti dezerton përballë përgjegjësisë
Deputeti i PDK-së, Abelard Tahiri ka drejtuar akuza ndaj kryeministrit Albin Kurti.
Ai ka shkruar se kryeministri po dezerton, ndaj përgjegjësive.
“Qeveria e tij ka qenë e destinuar të dështojë shpejt sepse ai kurrë s’e ka marrë seriozisht përgjegjësinë për të shërbyer ndaj vendit”, ka shkruar ai.
Reagimi i plotë:
Nuk është hera e parë që Albin Kurti dezerton përballë përgjegjësisë.
Qeveria e tij ka qenë e destinuar të dështojë shpejt sepse ai kurrë s’e ka marrë seriozisht përgjegjësinë për të shërbyer ndaj vendit.
Por kjo zhbërje e qeverisë së tij, po ndodhë në mënyrën perfide. Pikërisht në kohën kur uniteti e përgjegjësia për menaxhimin dhe parandalimin e virusit që po përhapet globalisht, kanë qenë më së të nevojshme, Albin Kurti dezertoi me paramendim përballë kësaj përgjegjësie. Por jo pa pasoja. Vetëm 45 ditë në detyrë, e me një bilanc rekord negativ.
E trumbetoi vetën si kryeministër premtues, e përfundoi si kryeministër mashtrues, me veprime tinëzare deri në momentin e fundit. E gjeti Kosovën më mirë se ç’është sot, e u kujdes ta lë më keq se çka qenë dje. Çorientoi institucionet. Largoi investitorët e huaj.
Prishi raportin special me SHBA-në.
Testoi daljen në det të Serbisë përmes Kosovës dhe të gjitha këto në kohë rekord. Por nuk nxori asnjë ligj, as një akt, as një vendim a veprim zhvillimor që lehtëson jetën e qytetarëve, veçse i mbuloi dështimet me akrobacione demagogjike.
Prandaj, ky dezertim me paramendim, është thellim i krizës e dyfishim i panikut. Kjo është e pafalshme për dikë që ka marrë besimin e qytetarëve për të qeverisur e i lë në baltë pikërisht kur duhet t’iu dalë në ndihmë./FaktePlus
