Studiuesit nga universiteti gjerman: Bota ka zbuluar vetëm 6 për qind të të prekurve nga Koronavirusi
Numri i përgjithshëm i infeksioneve me koronavirus ka të ngjarë të jetë në mënyrë drastike më i lartë se shifrat e regjistruara zyrtarisht nga autoritetet shëndetësore në të gjithë botën, sipas një studimi të ri.
Christian Bommer dhe Sebastian Vollmer nga Universiteti Göttingen në Gjermani analizuan të dhënat nga një studim i fundit i botuar në revistën mujore The Lancet Infectious Diseases.
Studiuesit shikuan vlerësimet e vdekshmërisë së koronavirusit dhe kohën nga infeksioni deri në vdekje për të vlerësuar cilësinë e regjistrave zyrtarë të rasteve, shkruan DW, përcjell Telegrafi.
Sipas studiuesve gjermanë, të dhënat treguan se vendet kanë zbuluar vetëm mesatarisht rreth 6% të të gjitha infeksioneve me koronavirus.
Ata pretenduan se numri i vërtetë i përgjithshëm i njerëzve të infektuar me koronavirus tashmë mund të ketë arritur në dhjetëra miliona njerëz në të gjithë botën.
“Këto rezultate nënkuptojnë që qeveritë dhe krijuesit e politikave duhet të bëjnë kujdes ekstrem kur interpretojnë numrat e rasteve për qëllime planifikimi”, tha Vollmer, profesor i Ekonomisë së Zhvillimit në universitet.
“Dallimet e tilla ekstreme në sasinë dhe cilësinë e provave të kryera në vende të ndryshme do të thonë që regjistrimet zyrtare të rasteve nuk japin informacion të dobishëm”, paralajmëroi ai.
