Sherifi: Dialogut me Serbinë të mos i referohen si dialog ndërmjet Prishtinës dhe Beogradit, por Kosovës dhe Serbisë
Sekretari i Përgjithshëm i Nismës Socialdemokrate, Bilall Sherifi, ka thënë se Serbia mohon shtetësinë e Kosovës edhe me emërtimin e dialogut mes dy vendeve duke iu referuar atij si dialog mes Prishtinës dhe Beogradit.
Ky veprim i Serbisë, ai thotë se nuk duhet ta çudisë askënd, por ajo që është për t’u habitur sipas tij, lidhet me përdorimin e të njëjtës terminologji edhe në Kosovë, si nga disa politikan, disa përfaqësues të shoqërisë civile, nga media të ndryshme në gjuhën shqipe etj!
“Prandaj të gjithë pa përjashtim duhet të jemi tepër të kujdesshëm dhe të përdorim terminologjinë e sakt: dialogu ndërshtetëror Kosovë-Serbi”, ka shkruar ndër të tjera ai në “Facebook”
Postimi i plotë i Bilall Sherifit:
Dialogu ndërshtetëror Kosovë-Serbi dhe terminologjia e shtetit të Serbisë! Duke mohuar në vazhdimësi shtetësinë e Kosovës, politika zyrtare e shtetit të Serbisë përpiqet ta prezantojë dialogun e ndërmjetësuar nga BE-ja dhe SHBA-të si dialog ndërmjet udhëheqësve të dy qendrave (Prishtinës dhe Beogradit)!
Edhe pse të gjithë e dinë se këtu nuk bëhet fjalë për dialog ndërmjet Shpend Ahmetit dhe kryetarit të Beogradit Zoran Radojçiqit, por ndërmjet përfaqësuesve të institucioneve më të larta shtetërore të dy vendeve, strategjia e Serbisë është që edhe në këtë formë të mos njohë delegacionin tonë shtetëror në cilësinë çfarë ata përfaqësojnë. Kjo mënyrë veprimi nga ana e Serbisë nuk e çudit askënd prej nesh! Por ajo që është për t’u habitur lidhet me përdorimin e të njëjtës terminologji edhe në Kosovë, si nga disa politikan, disa përfaqësues të shoqërisë civile, nga media të ndryshme në gjuhën shqipe etj! Prandaj të gjithë pa përjashtim duhet të jemi tepër të kujdesshëm dhe të përdorim terminologjinë e sakt: dialogu ndërshtetëror Kosovë-Serbi!
