Samsung Galaxy S10 mund të vijë në tri madhësi, me sensor të gishtave nën ekran
Samsung është ende disa javë larg prezantimit të Galaxy Note 9, por spekulimet tashmë kanë nisur për telefonin e ardhshëm kryesor të kompanisë koreanojugore: Galaxy S10.
Sipas Business Insider, analisti Ming-CHi Kuo ka thënë se beson që S10 do të vijë në tri madhësi të ndryshme: prej 5.8 inçësh, 6.1 inçësh dhe 6.4 inçësh.
Këto janë gati madhësitë e njëjta që Kuo pret t’i ketë seria e radhës e iPhone-ve, duke i mundësuar Samsung-ut ta rivalizojë direkt Apple-in.
Dy modelet më të mëdha të Galaxy S10 do të përfshijnë sensorët për gishtërinj nën ekran, ka thënë Kuo, përderisa modeli më i vogël do të ketë sensorin anash.
Kjo sugjeron se modeli më i vogël do të jetë versioni më bazik, përderisa dy më të mëdhenjtë me gjasë do të kenë specifika dhe veçori më të avancuara.
Kuo njihet për parashikimet e tij të sakta për planet e Apple-it për telefona të rinj, ndërsa së fundmi ka nisur të flasë edhe për planet e Samsung-ut, dhe deri më tani ia ka qëlluar.
Analisti beson se Samsung do ta reklamojë në veçanti sensorin e gishtërinjve nën ekran, si mënyrë për ta dalluar S10-shin nga iPhone, që do të shfrytëzojë skanimin e fytyrës.
Galaxy S10 është ende shumë larg prezantimit – Samsung zakonisht e zbulon linjën e re në fund të muajit shkurt.
Por, kompania mund të japë lajme së shpejti, sepse do të mbajë një konferencë më 9 gusht, për të prezantuar Note 9. /FaktePlus.net