Rrënqethëse: Pamje të të vrarëve në Ukrainë
Skena rrëqethëse janë publikuar nga morgu në Mykolaiv, një qytet në bregun e Detit të Zi që prej ditësh është shënjestër e sulmeve ruse.
Një i vdekur shihet i shtrirë me duar të palosura sikur po lutet.
Ai u hodhi bomba molotov rusëve kur e kapën, thotë një punëtor në morg, shkruan AFP.
Ia lidhën duart dhe e ekzekutuan.
Bora po bie vazhdimisht mbi trupat e mbështjellë me qese plastike ngjyrë gri në oborrin e institutit të mjekësisë ligjore ku ndodhet morgu.
Brenda, trupat vendosen në dysheme në dhoma të rrënuara për shkak të mungesës së hapësirës.
Aroma e përhapur e vdekjes është e përzier me një dezinfektues. Mjekët kryejnë autopsi në kushte të dyshimta higjienike.
Trupat e zhveshur vendosen pranë frigoriferit ku ishin grumbulluar viktimat e bombardimeve të Oçakovës aty pranë disa ditë më parë.
Vladimiri, një punëtor morgu, ndez cigare pas cigareje.
“Nuk kam parë kurrë diçka të tillë. Menduam se aksidentet e trafikut ishin gjëja më e keqe që mund të na kishte ndodhur këtu,” tha ai duke tundur kokën.
Janë rreth 30 trupa në tokë. Dy ushtarë me uniformë, ishin vendosur mbi njëri-tjetrin. Duket se ka edhe civilë.
“Ata janë shumë të rinj, më të rinj se nipi im”, thotë Vladimir.
Në pjesën e pasme të dhomës është një ushtar rus. “Ne i mbajmë të ndarë”.
Punëtori hoqi butësisht zinxhirin nga qafa e viktimës për të ndihmuar në identifikimin e tij
Mykolaiv dhe qytetet përreth kanë pësuar luftime të ashpra, por ukrainasit po rezistojnë dhe së fundmi kanë rifituar kontrollin e aeroportit lokal.