Reagon Mustafa: Gjykatën Speciale nuk e bëri Lulzim Basha, e Sali Berisha por Kuvendi i Kosovës
Lideri i Lidhjes Demokratike të Kosovës Isa Mustafa ka reaguar ndaj zërave kritikues ndaj zyrtarëve të Shqipërisë rreth Ushtrisë Çlirimtare të Kosovës.
Mustafa në një reagim në facebook tha se Shqipëria i doli në krah Kosovës në kohët më të vështira.
Ai tha se është shumë e rëndë t’i thuhet ndokujt nga Shqipëria që ka qenë kundër UÇK-së.
Tutje Mustafa tha se Gjykatën Speciale nuk e bëri Lulzim Basha, e Sali Berisha por e vendosi Kuvendi i Kosovës.
Reagimi i plotë i Mustafës:
Të nderuar qytetarë,
Shqipëria i doli në krah Kosovës në në kohët më të vështira rrugën e saj të çlirimit dhe shtetndërtimit, si gjatë qeverisjes së demokratëve ashtu edhe të socialistëve. Nëntë vite kam qenë në ekzil, nga viti 1990 deri më 1999, dhe e kam përjetuar Shqipërinë si shtëpinë time, shtetin tim.
E ndjej shumë rëndë që në vitin 2020 të “zbulojmë” se dikush nga Shqipëria pas çlirimit paska qenë kundër UÇK-së. Konstruktime të tilla të pavërteta, nuk iu ndihmojnë pjestarëve të UÇK-së që tani janë në Hagë. Nuk i bëjnë mirë të së vërtetës. I bëjnë keq harmonisë dhe solidaritetit shqiptar në Shqipëri dhe në Kosovë, që na nevojitet më shumë se çdoherë më parë.
Gjykatën Speciale, nuk na e bëri Lulëzim Basha , Sali Berisha, ….por për te vendosi Kuvendi i Kosovës. Nëse s’do ta bënte Kosova do të vendoste Këshilli i Sigurimit i KB. Shqipëria nuk ka dorë dhe as hile në këtë vendim dhe as në proceset gjyqësore që u zhvilluan pas lufte.
Për ne duhet të ketë qenë nder prezenca e shqiptarëve nga Shqipëria në misionin e UNMIK-ut, sikurse edhe e kosovarëve. Ka qenë ndihmë specifike.
Baltosja e njerëzve pa asnjë arsye të shëndoshë dhe pa argumente nuk është rrugë dhe mënyrë e mbrojtjes së vlerave të UÇK-së, të vlerave të shtetit tonë dhe të shtetit shqiptar. Duhet të pushojnë sulmet e tilla, sepse po na dëmtojnë. IM