Rasti i policit Izet Demaj: Ngritet aktakuzë edhe ndaj një personi tjetër
Prokuroria Themelore e Pejës ka ngritur aktakuzë ndaj të personit me iniciale U.M, nën dyshimet se kishte ndihmuar tashmë të ndjerin Kamer Metaj në grabitjen e bankës NLB ne qytetin e Istogut, incident ky që përfundoi edhe me vrasjen e policit Izet Demaj , shkruan Gazeta Express.
Sipas aktakuzës U.M e kishte ndihmuar Kamer Metajn duke e dërguar me makinë deri në qendër të Istogut, duke e vëzhguar edhe më pas situatën.
Në komunikatën e lëshuar nga Prokuroria përshkruhet në detaje se si ka ndodhur e gjithë grabitja.
E për këtë vepër, Prokurori i ka propozuar Gjykatës që të pandehurin ta dënojë dhe të shpallet fajtorë sipas ligjeve në fuqi.
Komunikata e plotë:
Prokuroria Themelore e Pejës, Departamenti për Krime të Rënda, ka ngritur aktakuzë kundër, U.M., për veprën penale të “ndihmës në kryerjen e veprës penale vjedhje grabitqare”, nga neni 328, paragrafi 4, lidhur me nenin 33, të Kodit Penal të Republikës së Kosovës.
Sipas aktakuzës, i pandehuri U.M., me datën 27 dhjetor të vitit 2018, në filialin e bankës NLB, në Istog, me dashje ka ndihmuar të pandehurin K.M. (tani i ndjerë), në kryerjen e veprës penale të vjedhjes grabitqare, pasi që paraprakisht kishin planifikuar në hollësi grabitjen e bankës në fjalë, në atë mënyrë që, sipas marrëveshjes paraprake, i pandehuri K.M., merr një pushkë automatike (ASH-78), një revole, një granat dore dhe me pas ja bën me dije të pandehurit U.M., se është gati, i cili merr veturën e të pandehurit K.M., e tipit Golf-4, për ta drejtuar, ndërsa i pandehuri K.M. ulet në pjesën e pasme të veturës, ku gjatë rrugës për në Istog, i njëjti maskon fytyrën, vesh xhaketën e zezë dhe sipër saj pallton me ngjyrë krem, ku me të arritur në Istog, në rrugën “Kadri Keqa”, i njëjti, pasi e fut granatën e dorës në xhepin e palltos, revolen në brez e pushkën automatike nën palltë, del nga vetura, ndërsa i pandehuri U.M., vazhdon rrugën në drejtim të bankës NLB në qendër të Istogut, ku fillimisht e vëzhgon situatën, e pastaj kthehet për në fshatin Shushicë, në pritje për ta lajmëruar i pandehuri K.M. (tani i ndjerë), për të shkuar ta marr të njëjtin.
Me këto veprime ekziston dyshimi i bazuar mirë se i pandehuri ka përmbushur elementet e veprës penale të përshkruar si me lartë.
Prokurori i çështjes me rastin e ngritjes se aktakuzës, i ka propozuar Gjykatës që i pandehuri të shpallet fajtor dhe të dënohen sipas ligjit për veprën penale e cila i vihet në barrë.