Putini ndryshon taktikat
Me aspiratat e saj për fitore të shpejtë, mirëpo të shkatërruara nga rezistenca e fortë ukrainase, Rusia është përqendruar gjithnjë e më shumë në rrëzimin e ushtrisë së Ukrainës në lindje, me shpresën që ta detyrojë Kievin ta dorëzojë një pjesë të territorit për t’i dhënë fund luftës.
Nëse Rusia arrin ta rrethojë e t’i shkatërrojë forcat ukrainase në zemrën industriale të vendit, Donbasin, mund të përpiqet edhe t’ia diktojë kushtet e saj Kievit e më shumë gjasë edhe të përpiqet ta ndajë vendin në dysh.
Analistë të shumtë kanë paralajmëruar se ndryshimi i strategjisë nga presidenti rus, Vladimir Putin, mund të reflektohet si pranim i dështimit të planit të tij ndaj Ukrainës, duke e detyruar atë t’i kufizojë qëllimet dhe t’i ndryshojë taktikat mes një lufte katastrofike që i ka shkaktuar Rusisë goditje të rëndë ekonomike dhe sociale.
Mathieu Boulegue, analist ushtarak, thotë se Putinit nuk i ka ecur plani mirë.
“Çka po shohim ne tani është pranimi nga udhëheqja ushtarake në Kremlin, madje ndoshta edhe nga vetë Putini që operacioni përfundimisht nuk po shkon sipas planit”, ka thënë ai.
Një zyrtar i lartë i mbrojtjes amerikane, i cili ka folur në kushte anonimiteti për t’i diskutuar vlerësimet e brendshme të inteligjencës amerikane, ka njoftuar se ka pasur pak ndryshim në situatën në terren në Ukrainë.
Boulegue ka theksuar se beson që Rusia do t’i përqendrojë trupat e saj drejt rajonit të Donbasit në javët e ardhshme në përpjekje që të ndërtojë lidhje tokësore midis Krimesë dhe rajonit të pushtuar të Donbasit.
“Ata do ta kthenin luftën e lëvizjes në një luftë rrënimi, pasi Rusia ta kuptojë se nuk është më në gjendje të pushtojë më shumë tokë ose të hyjë më tej në territorin ukrainas”.
Putini dhe gjeneralët e tij nuk kanë zbuluar qëllime specifike ushtarake apo afat kohor të planifikuar.
Humbjet e mëdha dhe ritmi i ngadaltë i ofensivës ruse mund të jenë faktorë që e detyrojnë Putinin t’i ulë ambiciet dhe të marrë një qasje më realiste.
“Rreziku më i madh tani është se do të ketë më pak tokë të çliruar të Ukrainës dhe tokë më shumë të kontrolluar nga Rusia. Kjo është një prej rreziqeve që ka marrë Rusia drejt Donbasit pasi do të krijonte gjeografi të re ushtarake, në të cilën Rusia do të mund ngrinte pozicionet”, ka thënë ai.
Megjithatë, Boulegue ka paralajmëruar se ekzistonte mundësia që nga zhgënjimi, rusët mund të fillojnë të përdorin “thellësinë dhe gjerësinë e zjarreve të tyre masive të artilerisë për t’i shtypur plotësisht qytetet ukrainase”.
Ai ka treguar se megjithëse Mariupoli ishte në “gjendje të keqe”, ushtria ruse nuk ka përdorur gjithë armatimin që kishte në dispozicion.