Presidenti i Shqipërisë pret studentët e AAB-së për 141 vjetorin e Lidhjes së Prizrenit
Me rastin e 141 vjetorit të Lidhjes së Prizrenit, presidenti i Republikës së Shqipërisë, Ilir Meta ka pritur në zyrat e tij një grup të studentëve të Kolegjit AAB, që vinin treva të ndryshe shqiptare.
Në këtë rast, Meta tha se do të bëhet të gjitha përpjekjet për të rritur shpresat e rinisë, duke ndërtuar të ardhmen e dy vendeve, Shqipërisë dhe Kosovës.
“Në këtë ditë të veçantë për kombin tonë, në 141-vjetorin e Lidhjes Shqiptare të Prizrenit dhe në prag të kremtimit të 20-vjetorit të çlirimit të Kosovës, pata kënaqësinë e veçantë të zhvilloja një takim të ngrohtë e vëllazëror me një grup studentësh e profesorësh nga të gjitha trevat shqiptare, të Kolegjit Universitar AAB në Prishtinë. I lumtur të ndanim qëndrimin se rinia duhet të jetë promotore e proceseve demokratike dhe integruese në të dy vendet tona dhe se është shumë e rëndësishme që Shqipëria e Kosova të forcojnë bashkëpunimin në të gjitha fushat”, ka shkruar Meta.
Ndërsa rektori i kolegjit Lulzim Tafa tha se AAB po kontribuon në arsimimin e studenteëve pa dallim etnie.
Ai e njoftoi presidentin Meta për veprimtarinë e Kolegjit AAB, the theksoi se Shqipëria vazhdon të mbetet dashuria e madhe e Kosovës dhe se ne gëzohemi për çdo sukses të Shqipërisë, ashtu siç mërzitemi edhe kur punët nuk shkojnë ashtu siç duhet.
Edhe studentët pjesëmarrës në këtë pritje shprehën falënderimet e tyre, ndërsa e vlerësuan lart këtë takim me presidentin Meta. Ata i bënë thirrje presidentit Meta, që ta vizitojë edhe Kolegjin AAB.
Presidentit Meta, në emër të studentëve dhe stafit akademik, iu dhurua edhe simboli i Prishtinës “Hyjnesha në fron”.