Policia izraelite përleshet me besimtarët palestinez në xhaminë Al-Aqsa, dhjetëra të lënduar (VIDEO)
Dhjetëra persona janë plagosur pas përleshjeve që shpërthyen mes policisë izraelite dhe palestinezëve në xhaminë Al-Aqsa të Jerusalemit.
Pamjet treguan oficerët duke përdorur gaz lotsjellës dhe granata trullosëse për të shpërndarë një turmë, disa të veshur me maska, të cilët policia tha se po gjuanin gurë dhe fishekzjarre ndaj tyre.
Të paktën 90 palestinezë janë lënduar, sipas shërbimit emergjent të Gjysmëhënës së Kuqe palestineze.
Mijëra besimtarë u mblodhën në xhami, mes tensioneve tashmë të larta pas një vargu sulmesh.
Sipas indaumentit islamik që administron vendin, policia izraelite hyri me forcë në zonë menjëherë pas lutjeve të mëngjesit. Ata thanë se një roje u qëllua në sy me një plumb gome.
Ministria e Jashtme e Izraelit tha se dhjetëra burra të maskuar që mbanin flamuj palestinezë dhe të Hamasit kishin marshuar drejt kompleksit.
“Policia u detyrua të hynte në terren për të shpërndarë turmën dhe për të hequr gurët, me qëllim parandalimin e dhunës së mëtejshme”, shkruhej në deklaratë.
Tre oficerë ishin plagosur, sipas tyre.
Xhamia është vendi i tretë më i shenjtë në Islam dhe është ndërtuar në një majë kodre që është vendi më i shenjtë për hebrenjtë, të cilët i referohen asaj si “Mali i Tempullit”.
Ka qenë një pikë e rëndësishme për dhunën izraelito-palestineze për dekada.
Nga fundi i marsit dhe fillimi i prillit, Izraeli pësoi një nga valët më të këqija të sulmeve që ka përjetuar prej vitesh.
Në katër incidente të veçanta, 14 izraelitë u vranë dhe dhjetëra u plagosën, raporton SkyNews, transmeton Klankosova.tv.
Izraeli ka kryer një sërë arrestimesh dhe operacionesh në Bregun Perëndimor të pushtuar, duke shkaktuar përleshje me palestinezët.
Të paktën 25 palestinezë janë vrarë në valën e fundit të dhunës – shumë prej tyre që kishin kryer sulme ose ishin përfshirë në trazira – por gjithashtu një grua e paarmatosur dhe një avokat që duket se është vrarë gabimisht.