Plazhi i Floridës mbushet me njerëz 30 minuta pas rihapjes
Qindra njerëz ia kanë mësyrë plazhit në Jacksonville të Floridës në Shtetet e Bashkuara pas hapjes së kësaj hapësirë për publikun, pavarësisht pandemisë së koronavirusit.
Plazhi në këtë qytet u hap të premten pasdite në orën 5 për kohë të caktuar dhe me kufizime, ndonëse Florida e shënoi numrin më të lartë të rasteve të reja të koronavirusit prej fillimit të përhapjes.
Departamenti i Shëndetësisë në Florida i ka regjistruar 1,421 raste të infektimeve vetëm të premten, që paraqet shifrën më të lartë për periudhën njëditore. Numri i përgjithshëm i të infektuarve shkoi në 24,753, ndërsa 726 persona kanë vdekur, shkruan “Daily Mail”.
Plazhet në Jacksonville tashmë do të hapen çdo ditë nga ora 6 e mëngjesit deri në orën 11 të paradites dhe nga ora 5 e pasdites deri në orën 8 në mbrëmje. Njerëzit kanë të drejtë vetëm të ecin dhe të notojnë, por nuk kanë të drejtë të rreziten.
Ndryshe, Shtetet e Bashkuara ndodhen në vendin e parë në botë si vendi me më së shumti të vdekur dhe të infektuar nga koronavirusi, me dallim të madh nga Italia dhe Spanja, që ndodhen në pozitat dy dhe tre.
