PDK: VV po instalon frikën dhe po përgatitet për dhunë në Kosovë, të dënohet nga të gjithë
Partia Demokratike e Kosovës, dënon thirrjet e zyrtarëve të lartë të Vetëvendosjes këto ditë për dhunë dhe vëllavrasje. PDK konsideron se kjo gjuhë e dhunshme është e dënueshme sepse po nxit një konflikt të rrezikshëm shoqëror.
“Këto deklarata të organizuara nga Lëvizja Vetëvendosje brenda dhe jashtë Kosovës, e kanë për qëllim nxitjen e një zinxhiri të dhunës që del jashtë institucioneve shtetërore për të mbajtur pushtetin me çdo kusht”, thuhet në njoftim e PDK-së.
“Ato filluan me Albin Kurtin në Kuvendin e Kosovës, i cili gjatë seancës paralajmëroi trazira, për t’u përshkallëzur me deklarata kërcënuese të Agim Bahtirit, Boiken Abazit, Artan Abrashit e përfaqësuesve të tjerë të LVV-së të cilët kanë folur për dhunë, anarki e vëllavrasje”.
PDK thotë se dënojnë rëndë gjuhën e urrejtjes dhe krijimin e klimës së frikës nga zyrtarë të lartë të Vetëvendosjes, të ndihmuar dhe orkestruar edhe nga analistë të papërgjegjshëm në Shqipëri e Kosovë.
Partia Demokratike e Kosovës tutje thotë se nuk do të lejojë askënd që të kërcënojë sigurinë publike, të mbjelli përçarje, të nxit konflikt civil e të shkeli rendin kushtetues.
Sipas PDK-së, pasojat e këtyre veprimeve janë të paparashikueshme dhe përgjegjësia totale për çfarëdo që ndodh ka për të qenë e gjitha e Lëvizjes Vetëvendosje.