Pandemia në SHBA, 27 milionë të infektuar dhe rreth 400 mijë viktima

Shtetet e Bashkuara të Amerikës mbesin vendi më i prekur i globit nga pandemia koronavirus, teksa i afrohen dhe një bilanci tepër të trishtë.

Më shumë se 27 milionë persona janë infektuar ndërsa rreth 400 mijë të tjerë kanë humbur jetën, sipas të dhënave të raportuara nga Universiteti Johns Hopkins.

Qëndra për Parandalimin dhe Kontrollimin e sëmundjeve thotë se janë injektuar mbi 12 milionë doza të vaksinave anti-covid. Por paralajmëron për një variant të ri të koronavirusit, i cili kërcënon të bëhet një formë dominante e pandemisë nga Marsi. Autoritetet po u bëjnë thirrje amerikanëve që të dyfishojnë masat e sigurisë dhe të mbrojtjes.

Ndërkohë, situatë shqetësuese paraqitet dhe në Mbretërinë e Bashkuar, nga ku doli mutacioni i ri i koronavirusit. Shëndetësia raporton se çdo 30 sekonda, një i infektuar paraqitet në spital. Britania vijon fushatën e imunizimit masiv dhe deri më tani ka vaksinuar 3.5 milionë njerëz me dozën e parë, duke tejkaluar numrin e atyrë të konfirmuar pozitivë. Rreth gjysëm milioni kanë marrë të dyja dozat. Janë hapur dhe qendra të tjera shtesë për të përshpejtuar imunizimin.

Mbretëria e Bashkuar shpreson që të shqyrtojë heqjen e izolimit duke nisur nga Marsi përmes kthimit të kufizimeve me nivele dhe zona.