Osmani në Islandë, takon kryeministren e flasin për procesin e anëtarësimit të Kosovës në KE
Presidentja e Kosovës, Vjosa Osmani, gjatë vizitës së saj në Islandë ka takuar kryeministren e këtij vendi, Katrin Jakobsdottir.
Në këtë takim, sipas Osmanit është diskutuar për procesin e anëtarësimit të Kosovës në Këshillin e Evropës.
“Sot në Rejkjavik, bashkë me kryeministren e Islandës, Katrin Jakobsdottir, diskutuam intensifikimin e bashkëpunimit me Islandën në fusha të ndryshme të interesit të përbashkët, e në veçanti gjatë presidencës islandeze të Këshillit të Evropës. Shtyrja përpara e procesit të anëtarësimit të Kosovës në Këshillin e Evropës është e një rëndësie të veçantë, meqë nga kjo do të përfitojnë të gjithë qytetarët tanë, pa dallim”, ka shkruar Osmani në Facebook.
Tutje presidentja ka shkruar se populli i Kosovës i është gjithnjë mirënjohës Islandës për mbështetjen e palëkundur përgjatë viteve, ndërsa ka theksuar se bashkërisht, në frymë të vlerave të përbashkëta demokratike, do të vazhdojnë ta forcojnë partneritetin ndërshtetëror.