OEK dhe OEAK mirëpresin marrëveshjen për rinisjen e fluturimeve Prishtinë-Beograd
Oda Ekonomike e Kosovës dhe Oda Ekonomike Amerikane në Kosovë kanë mirëpritur iniciativën e fundit për rinisjen e fluturimeve komerciale ndërmjet Kosovës dhe Serbisë.
Përmes një komunikate, Odat ekonomike e konsiderojnë këtë si “hap përpara në përmirësimin e marrëdhënieve ndërfqinjësore dhe lirisë së lëvizjes së njerëzve dhe mallrave ndërmjet shteteve të rajonit të Ballkanit Perëndimor”.
“OEK dhe Oda Amerikane përsërisin qëndrimin se tregtia e lirë është një faktor esencial në të mundësuarit e rritjes ekonomike përmes efikasitetit dhe inovacionit të shtuar, shkëmbimit tregtar, cilësisë më të lartë dhe çmimeve më të ulëta për konsumatorët e rajonit, prandaj barrierat në tregti nuk janë në linjë me frymën e zotimeve të dhëna në kuadër të marrëveshjeve për tregti të lirë, kornizës së bashkëpunimit rajonal të përcaktuar në kuadër të procesit të Berlinit dhe zotimeve të shteteve për avancimin e rrugëtimit në integrimin evropian”.
“Bashkëpunimi ekonomik rajonal vetëm sa do të përmirësonte perceptimin për rajonin në sytë e investitorëve të huaj, prandaj, rinisja e fluturimeve do të ofronte përfitime vitale ekonomike, si dhe do të kontribuonte në normalizimin e marrëdhënieve ndërmjet Kosovës dhe Serbisë, si dhe rajonit në tërësi”, thuhet tutje.
Oda Ekonomike e Kosovës dhe Oda Ekonomike Amerikane thërrasin autoritetet në Kosovë dhe në Serbi të ndërmarrin të gjithë hapat e nevojshëm për implementimin e duhur të marrëveshjes.