Ndryshojnë çmimet e derivateve në Kosovë, kaq para tani kushton një litër naftë
Edhe pse çmimet e derivateve të naftës në Kosovë ishin të ulëta gjatë pandemisë, ato tashmë kanë shënuar ngritje. Aktualisht në Kosovë çmimi i naftës sillet rreth 0.87 centë, kurse benzina 0.88 centë.
Në Shoqatën e Naftëtarëve kanë deklaruar se çmimet në Berza dhe nga organizata OPC po shënojnë rritje.
Kryetari i Shoqatës së Naftëtarëve të Kosovës, Fadil Berjani për Agjencinë e Lajmeve FaktePlus ka pohuar prodhimet ndërkombëtare janë reduktuar dhe për këtë shkak po rriten çmimet e derivateve.
“ Aktualisht në Kosovë kemi çmime të ulëta në krahasim me vendet e rajonit. Mirëpo nafta në vend sillet me çmim prej 0.87 euro dhe benzina 0.88”, ka thënë Berjani.
Tutje numri një i Shoqatës së Naftëtarëve, thotë për FaktePlus se sektori i naftës në Kosovë ende nuk ka filluar punën 100 për qind.
Ai thotë se shumica e kompanive të derivate po punojnë me kapacitet të përgjysmuar.
“ Ndikimi i pandemisë në sektorin tonë ka bërë që ky sektor ende të punoj me kapacitet të përgjysmuar. Sektori i naftës është duke punuar me kapacitet 50 deri në 60 për qind”, thotë Berjani.
Ndryshe prej që Qeveria e Kosovës kishte marrë vendim për masat mbrojtëse ndaj Koronavirusit, importi i derivateve ka rënë.
Për këtë ditë më parë ka raportuar FaktePlus ku pronarë të kompanive të derivateve kanë treguar humbjet e tyre gjatë kësaj kohe.
Vetëm për tre javë, HIB Petrol ka pësuar rënie të derivateve për 80 për qind ndërsa, Petrol Company ka pësuar rënie rreth 30 për qind.
Pronari i kompanisë HIB Petrol, Ibrahim Bucaliu, për Agjencinë e Lajmeve FaktePlus ka treguar për rënien që ka pësuar kompania e tij.
“Sa i përket çmimit të naftës, është fakt që çmimi ka rënë por tani lëvizja është veç 20 për qind me situatën normale. 80 për qind kemi rënie të derivateve. Vetëm 20 për qind punohet dhe atë më shumë janë vetëm policia, ndihmat e shpejta, zjarrfikësit dhe disa prej tyre që në kohë të caktuar dalin. Shteti nuk ndërmerr asgjë, absolutisht. Me falimentimin e bizneseve, falimenton edhe shteti sepse bizneset janë ato që e mbajnë shtetin dhe buxhetin”, tregon Bucaliu për FaktePlus.
Bucaliu ka kritikuar edhe shtetin, duke thënë se për 40 vite që merret me biznes gjithnjë kanë llogaritur vetëm në forcat e tyre.
Shteti i gjobiti kompanitë me mbi 4 milionë, tash s’u del në ndihmë punëtorëve me 170 euro
Tutje ka theksuar se me falimentim të bizneseve, do të falimentoj edhe shteti.
“Unë jam në biznes 40 vite, por fatkeqësisht prej shteti nuk kemi pritur kurrë asgjë. Ne gjithnjë kemi llogaritur në forcat tona dhe tani po mundohemi ta përballojmë”, tha Bucaliu.
Ndërkaq, Petrol Company ka shënuar rënie rreth 30 për qind. Kështu kanë bërë të ditur Valentina Mekani nga Petrol Company për Agjencinë e Lajmeve FaktePlus.
“Kjo situatë normal që ndikon negativisht në të hyrat e kompanisë, dhe ka pasojat e veta. Deri me tani ka një rënie për rreth 30%”, ka treguar Mekani për FaktePlus.
Mirëpo sipas përfaqësuesve të kompanisë Petrol Company, edhe përkundër se nuk ka asnjë përkrahje për bizneset e mëdha, ata sërish do t’ia dalin ta përballojnë situatën e krijuar nga Koronavirusi.
“Do ta përballojmë këtë situatë, përkundër që nuk ka asnjë përkrahje për bizneset e mëdha, me përjashtim të shtyrjes së pagesave ndaj ATK, dhe obligimeve bankare. Petrol Company do ta përballon këtë situatë pa marr parasysh sa do të zgjat kjo situatë”, tha Mekani.
Edhe Petrol Company ka punuar me staf të reduktuar.
“Petrol Company shpk, ka marr të gjitha masat e nevojshme për dezinfektim, pajisje mbrojtëse, dhe punojmë me staf të reduktuar në ambientet tona kurse një pjesë operojnë nga shtëpia”, thuhet në përgjigjen Mekanit.
Nafta apo ari i zi, është ndër produktet më të kërkuara dhe më fitimprurëse edhe në Kosovë.
Pasi që Kosova nuk ka rafineri të vetën, operatorët ekonomikë brenda një viti importojnë rreth 700 milionë litra të këtyre derivateve. Derivatet në Kosovë kryesisht importohen nga Serbia, Greqia dhe Bullgaria. /FaktePlus
Pandemia godet fort “Arin e zi”, çmimet e derivateve në Kosovë bien për toke