Mustafa kërkon që masa e reciprocitetit te koordinohet me SHBA-në
Albin Kurti insiston se duhet të ndodh reciprociteti me shtetin serb, pavarësisht paralajmërimit të SHBA-së që kjo të mos ndodh. Në anën tjetër partneri i tij qeverisës, Isa Mustafa, thotë se krejt ky proces duhet të bashkërendohet me shtetin amerikan.
Kryetari i Lidhjes Demokratike të Kosovës, Isa Mustafa, ka thënë se bashkërenditja me SHBA-në është thelbësore, kur është pyetur se a e përkrah vendosjen e reciprocitetet pas presionit amerikan që kjo të mos ndodh.
“Themelore është që procesi të bashkërenditet me SHBA-të, si partner strategjik i yni. Çështjet e tjera mbesin modalitete”, ka thënë Mustafa në një përgjigje për Express.
Lëvizja Vetëvendosje e Lidhja Demokratike e Kosovës pjesë të marrëveshjes për qeverisje e kanë pasur zëvendësimin e tarifës ndaj produkteve serbe me masa të reciprocitetit.
Mirëpo Shtetet e Bashkuara të Amerikës e përkrahin pjesërisht këtë pikë të marrëveshjes. Kërkojnë heqjen e taksës, por i thonë jo reciprocitetit.
Në anën tjetër, Zyra për Media e Vetëvendosjes ka thënë se për çështjen e reciprocitetit qëndrojnë pas asaj që janë marrë vesh me LDK-në.
“Do të zëvendësojmë tarifën 100% dhe do të zbatojmë reciprocitetin e plotë tregtar me Serbinë sikurse me secilin shtet. Tarifa ka qenë vendim i qeverisë së kaluar. Ne nuk jemi për tarifa si masë ndëshkuese ndaj konsumatorit por për reciprocitet si masë mbrojtëse ndaj prodhuesve”, ka thënë Kurti ditë më parë./FaktePlus
