Liverpooli i refuzon dy oferta për Shaqirin
Liverpooli i ka refuzuar dy oferta për ta huazuar Xherdan Shaqirin nga Roma dhe Sevilla, pasi që trajneri Jurgen Klopp është i bindur në vendimin për ta mbajtur përfaqësuesin zviceran me origjinë nga Kosova në skuadër deri në fund të sezonit.
Xherdan Shaqiri ka ngjallur interesim te një numër i klubeve evropiane këtë afat kalimtar të janarit, pasi ka dështuar ta zë një vend në skuadrën e Jurgen Kloppit këtë sezon, transmeton Gazeta Express.
28-vjeçari ka qenë titullar vetëm në tre ndeshje të këtij sezoni – e fundit në gjysmëfinalen e Kupës së Botës për Klube kundër klubit meksikan Monterrey, muajin e kaluar.
Një numër i lëndimeve e kanë dëmtuar këtë sezon edhe më shumë për Shaqirin, i cili s’ishte fare në dispozicion për ndeshjen e së dielës kundër Manchester Unitedit për shkak të një lëndimi të lehtë muskulor. Megjithatë, ai shpreson të kthehet në kohë për ndeshjes e fundit të katërt të FA Cup, kundër Shrewsburyt.
Sevilla, përmes drejtorit sportiv Monchi, e ka bërë një tentim zyrtar për ta transferuar në formë huazimi Shaqirin këtë muaj, përderisa Roma nuk e kontaktoi klubin përmes ndonjë ndërmjetësi. Që të dyja klubeve u është bërë e qartë se Liverpooli s’do ta shesë ish-yllin e Stoke Cityt këtë muaj.
Mediumet italiane pretenduan se Liverpooli i ka vendosur Shaqirit çmim prej 15 milionë eurosh, mirëpo këto raportime mohohen nga uebsajti Goal, që raporton se Liverpooli do t’i kërkojë rreth 30 milionë për Shaqirin këtë verë.
Shaqiri iu bashkua Liverpoolit për 13.5 milionë funte në verën e vitit 2018 dhe i bëri 30 paraqitje në sezonin e tij debutues në Anfield, duke i shënuar gjashtë gola.
