Latifi jep detaje për të vdekurin nga Covid-19, thotë se në gjendje të rëndë është edhe inspektori i komunës

Sot në orët e mëngjesit në Klinikën Infektive ka ndërruar jetë E.K nga Rahoveci, i cili ishte i prekur me Covid-19.

Kryetari i Rahovecit Smajl Latifi tha se i ndjeri kishte edhe sëmundje tjera shoqëruese, dhe është punëtor i një ndërmarrjeje.

Latifi tha për Indeksonline se në gjendje të rëndë shëndetësore është edhe një inspektor i Komunës së Rahovecit, i cili ka qenë i shtrirë më herët në spital, dhe gjatë ditës së djeshme ka rezultuar pozitiv me Covid-19.

Dje pas dy rasteve të konfirmuara nga IKSHPK-ja, Latifi tha se kanë marrë hapat e nevojshëm për të ndaluar përhapjen e infeksionit.

Kujtojmë që ditë më parë kryetari ka marrë vendim për të filluar aplikimin e masave shtesë, pas përhapjes së koronavirusit në vend.

Latifi ka thënë se ndër hapat që do të merren janë reduktimi i stafit zyrtar në të gjithë drejtorit komunale, përveç atyre të personelit shëndetësor dhe Inspektoratit Komunal.