Ky është mesazhi i Grenellit pas takimit me Isa Mustafën
I dërguari i SHBA-së për dialogun Kosovë – Serbi, Richard Grenell ka vizituar edhe Lidhjen Demokratike të Kosovës.
Takimi i cili ka filluar para orës së caktuar mes Richard Gernell dhe Isa Mustafës tashmë ka përfunduar.
Pas këtij takimi Gernell ka folur para medieve ku ka thënë se është këtu për të folur për zhvillimin ekonomik të vendit dhe jo për çështje politike dhe formimin e qeverisë.
Grenell ka shtuar se janë të interesuar në zhvillim ekonomik. Ambasadori amerikan në Berlin ka bërë thirrje që të hiqet tarifa, ndërsa, ka përsëritur se do të kërkojë nesër në Beograd që të ndalet fushata për heqje të njohjeve.
“Sapo u takova me liderët e LDK-së, dua që të falënderoj z.Mustafën që na ka pritur, kemi shikuar disa fotografi prej karrierës së tij dhe ai ka shumë eksperiencë. E ndava mesazhin e njëjtë që është se ne në Amerikë nuk jemi të interesuar që të përfshihemi ose se si do të formohet qeveria, ne jemi të interesuar në zhvillim ekonomik, dhe e ndava vizionin tim për të arritur aty shumë shpejtë duke hequr tarifën, ndërsa serbët që të ndalin kampanjën për tërheqje të njohjeve.
Kemi folur specifikisht për projektet e radhës që janë duke u planifikuar”, ka thënë ai.
I deleguari amerikan në dialog ka thënë se duhet të ndalen përplasjet politike dhe duhet të mendohet për zhvillim të ekonomisë.
“Unë mendoj se ky progres fillon me ndaljen e përplasjeve politike dhe duke menduar se çka mund të bëhet për të sjellë punë të reja në Kosovë, Serbi dhe në krejt regjionin”, ka shtuar ai.
