Kurti pas aksidentit në Badoc: Lus të keni kujdes në komunikacion

Kryeministri Albin Kurti iu ka bërë thirrje qytetarëve t’i respektojnë rregullat e komunikacionit dhe të kenë kujdes në ngasje, pas aksidentit të së shtunës ku humbën jetën tre persona.

Ai iu ka shprehur ngushëllime familjarëve të viktimave, duke thënë se në këtë kohë të rëndë ndan dhimbjen dhe pikëllimin me ta.

“Vdekje tragjike e tre të rinjve mbrëmë rreth mesnatës. Ngushëllime të sinqerta familjeve, shokëve dhe shoqeve të tyre. Në këtë kohë të rëndë ndajmë dhimbjen dhe pikëllimin me ta. I lus qytetarët që të kenë kujdes e t’i respektojnë rregullat e komunikacionit si dhe të dekurajojnë të gjithë ata që praktikojnë tejkalimin e shpejtësisë së lejuar apo afirmojnë vozitjen tepër të shpejtë”, ka shkruar Kurti në Facebook.