Kina ndërton qendër karantine me 5.000 dhoma për ata që vijnë nga jashtë
Kur bëhet fjalë për të mbajtur larg COVID-19, pak vende duken të gatshme të shkojnë aq larg sa Kina.
Ndërsa vendet në të gjithë botën rihapin kufijtë dhe lehtësojnë kufizimet e koronavirusit, Pekini po dyfishon strategjinë e tij zero-Covid. Shembulli i fundit: një strukturë karantine prej 260 milionë dollarësh, me 5,000 dhoma për udhëtarët që hyjnë, që hapet në metropolin jugor të Guangzhou në ditët në vijim.
I përbërë nga ndërtesa trekatëshe të mbuluara me çati gri në stilin tradicional kinez, të rreshtuara, kompleksi masiv përfshin një zonë me madhësinë e 46 fushave të futbollit dhe u deshën më pak se tre muaj për t’u ndërtuar nga e para në periferi të qytetit, raporton CNN.
Ai do të zëvendësojë hotelet e përcaktuara të vendosura në të gjithë Guangzhou për të karantinuar udhëtarët kinezë dhe ndërkombëtarë që vijnë nga jashtë – një lëvizje që synon zvogëlimin e ekspozimit të banorëve ndaj rasteve të importuara.
Udhëtarët do të transferohen me autobusë direkt nga aeroporti dhe do të kufizohen në dhomat e tyre për të paktën dy javë. Çdo dhomë është e pajisur me videokamerë për bisedim dhe një termometër, me tre vakte në ditë të ofruara nga robotët – të gjitha të dizajnuara për të minimizuar kontaktet e drejtpërdrejta me anëtarët e stafit.
