Këshilltari i Thaçit godet Haxhiun: Po gabon shumë shpesh

Pas akuzave të Albulena Haxhiut në drejtim të presidentit Thaçi ka reaguar edhe këshilltari i këtij të fundit Adil Behramaj.

Ai përmes një postimi në llogarinë e tij në facebook ka thënë se Ministrja e Drejtësisë Albulena Haxhiu po ngutet dhe po gabon shumë shpesh.

Behramaj më tej ka thënë se qeveria Kurti nuk është në gjendje të menagjojë më një situatë të jashtëzakonshme prandaj po bëjnë gabime të mëdha.

Si pasojë e keqmenaxhimit të situatës nga qeveria Kurti po rritet edhe më tej numri i të infektuarve nga virusi COVID19 ka shkruar më tej Behramaj.

Ky është postimi i plotë i Adil Behramaj:

Paaftësinë e Qeverisë së Kosovës për ta menaxhuar një situatë të jashtëzakonshme, qoftë edhe për vetëm një muaj, ministrja Albulena Haxhiu qenka munduar ta mbulojë njëjtë, siç bëjnë gjithmonë këta, duke u marrë me presidentin.

Sikur të kishit ditur ju çfarë është menaxhimi, sot nuk do t’i kishim këto raste të të infektuarve në rritje nga individë të ardhur nga jashtë Kosovës. Por, të gjithë të ardhurit do t’i trajtonit dhe izolonit me kohë. Ky numër tani pandalshëm është në rritje si pasojë e keqmenaxhimit tuaj.

Sikur të dinit ju çfarë është menaxhimi dhe të ju interesonin qytetarët, nuk do i linit ata të prisnin me orë të tëra për t’i bërë analizat dhe hequr shqetësimet e tyre, duke ju pritur juve deri sa i keni përfunduar tuajat në Qeveri e Kuvend.

Edhe, përkundër që po përtoj çdo ditë të merrem me paaftësinë tënde si ministre, po e shfrytëzoj këtë rast të ta sqaroj që votimi i dekretit të presidentit për shpalljen e Gjendjes së Jashtëzakonshme, siç është kërkuar në bazë të nenit 131, paragrafi 1.3, nuk bëhet me 2/3 e deputetëve, sepse sërish ishe ngatërruar, por me shumicë të thjeshtë. Votimi me 2/3 e deputetëve kërkohet vetëm kur Gjendja e Jashtëzakonshme tejkalon 150 ditë.

Po dukesh shumë e ngatërruar, ministre. Po gabon shumë shpesh!