Juventusit humbja i kushton mbi 13 milionë euro
Pas eliminimit në çerekfinale, Juventusi ka dështuar edhe në një objektiv financiar: atë të kuotës prej 100 milionë euro të ardhurash nga edicioni i sivjetshëm i Champions League.
Vetëm për “faj” të Ajaksit, “Zonja e vjetër” e Italisë është ndalur në kuotën 94.1 milionë euro në total, përfshi shpërblimet e UEFA-s, por pa llogaritur këtu të ardhurat nga biletat në “Allianz Stadium”, teksa vetëm në ndeshjen e djeshme u arkëtuan 5 milionë euro.
Sipas bilancit të një të përditshmeje torineze, nga 94.1 milionë eurot e arkëtuara; 18.3 milionë vijnë nga marketingu, 15.3 milionë nga bonusi i pjesëmarrjes, 29.7 milionë nga renditja historike e dekadës së fundit, 10.8 milionë nga rezultatet, 9.5 milionë euro nga bonusi për 1/8-at e finaleve dhe 10.5 milionë nga bonusi i çerekfinaleve.
Fakti që nuk do të marrin pjesë në gjysmëfinale i ka kushtuar Juventusit 12 milionë euro bonus, shto këtu edhe 1.1 milion euro nga marketingu, me të cilat Juventusi do të mund të tejkalonte për herë të dytë, pas sezonit të mbyllur me finalen e Cardiffit, kuotën e 100 milionë eurove; duke mbërritur në kuotën 107 milionë eurove.
Por, dështimi në Evropë është ndierë edhe në bursë. Aksionet e klubit bardhezi kanë rënë me 24 për qind, për t’u rriti disi me kalimin e kohës në nivelin -19 për qind krahasuar me një ditë më parë.
Ndryshe nga Juve, aksionet e Ajaksit në bursën e Amsterdamit janë rritur me 10 për qind.