Isa Mustafa konfirmon presionin nga ndërkombëtarët: Duan sa më shpejtë të bëhet qeveria
Ambasadorët e shteteve të QUINT-it dhe Bashkimi Evropian janë duke insistuar që sa më shpejtë Kosova t’i krijojë institucionet e saja. Kështu ka deklaruar në një prononcim, kryetari i LDK-së, Isa Mustafa.
Ai ka konfirmuar se në mbledhjen e sotme të Kryesisë së partisë, do të trajtohet çështja e koalicionit me Lëvizjen Vetëvendosje, pasi kjo e fundit edhe “de jure” i dërgoi presidentit mandatarin për kryeministër.
“Ne e kemi mbledhjen e Kryesisë… sot. Do të bisedojmë lidhur me këtë çështje. Do të mundohemi që të gjejmë rrugë për me ba marrëveshje”, është shprehur ai.
Më tej, Mustafa foli edhe për takimin që zhvilloi me ambasadorin e Britanisë së Madhe në Kosovë, Nicholas Abott.
“Ambasadat janë të interesuara, që Kosova të ketë Qeveri dhe për këtë arsye vijnë dhe bisedojnë me ne. Edhe ne jemi të interesuar që sa më shpejt Kosova të bëhet me Qeveri”, ka deklaruar Mustafa.
