Haradinaj: Mogherini ndihej në borxh ndaj Serbisë e Rusisë, e ofendoi popullin e Kosovës
Kryetari i AAK-së, Ramush Haradinaj, ka thënë se ish-ndërmjetësuesja e dialogut ndërmjet Kosovës dhe Serbisë, Frederica Mogherini ndihej në borxh ndaj Serbisë e Rusisë, përderisa pagën e merrte nga BE.
Ai ka thënë se Mogherini e ka trajtuar shumë keq Kosovën gjatë drejtimit të saj.
“Zonja Mogherini më shumë është ndi në borxh ndaj Serbisë e Rusisë, sesa ndaj BE-së që ia ka dhanë pagën, e SHBA-së. Kam pas dyshime në plot nivele që dicka është kah zihet në ato negociatat e fshehtë. Përveç dyshimeve, ka pas informacione se po bisedohet për një marrëveshje për shkëmbime territoriale”, ka thënë Haradinaj në RTV 21.
“Zonja Mogherini e ka ofendu Kosovën, sepse ia ka anuluar kryeminsitrit Haradinaj konferencën e paralajmërume me protokoll sepse unë e kam kërku SHBA-në në tavolinë. Sot SHBA-në e kemi në dialog, BE nuk e ka menaxhu rolin e vet në këtë dialog. BE sot i ka në process të dialogut dy zyrtarë që vinë nga vende që nuk e kanë njohur Kosovën e pavarur”, ka thënë ai.
Haradinaj ka thënë se BE duhet të angazhohen më shumë rreth këtij procesi.
“Nuk e kuptoj si mundet me na ndihmu Berlini e Franca, kur nuk angazhojnë njerëz të afërt të tyre në parlament. Presidenti Trump e bëri, e emëroi ambasadorin Grenell”, ka theksuar Kryetari Haradinaj.
Ai ka thënë se nuk beson më që ka rrezik nga ndarja, pas vitit 2018, pasi që ideja nuk ka më përkrahje.
