Greqia kalon suazat sportive për ta mposhtur Kosovën
![](https://fakteplus.net/wp-content/uploads/2022/06/287208935_395545735967820_7541503300682229693_n-scaled.jpg)
Greqia i ka tejkaluar edhe suazat sportive për t’i marrë tri pikët në ndeshjen ndaj Kosovës të zhvilluar në Volos.
Kosova është mposhtur në udhëtim nga Greqia. “Dardanët” u mposhtën 2:0 ndaj Greqisë në Volos, duke humbur edhe matematikisht gjasat për vendin e parë në kuadër të Ligës së Kombeve.
Greqia ishte dukshëm më e mirë se Kosova, duke patur posedimin dhe administrimin e plotë të ndeshjes, shkruan Gazeta Express.
Se provokimet do të ishin të pranishme nga tifozët grekë vazhdimisht, e dëshmoi fakti kur u vërshëllye me të madhe himni i Kosovës para fillimit të ndeshjes.
Më pas, futbollistët kosovarë u penguan nga lazerët e tifozëve grekë në tërë ndeshjen.
Përkundër kësaj, Kosova u mbajt mirë në pjesën e parë, e cila u mbyll pa gola, ndonëse ishte shumicën e kohës në mbrojtje.
Goli i parë i ndeshjes erdhi në minutën e 71-të, kur Giakoumakis shënoi me kokë.
Pas golit, ndeshja u ndërpre për më shumë se pesë minuta, pasi tifozët grekë hynë në fushë dhe nisën përleshjen me tifozët kosovarë.
Ishte Vedat Muriqi që dëgjohej duke i thënë gjyqtarit kosovar që ta ndërpriste ndeshjen, pasi ky më nuk ishte futboll.
Ankesat e “Dardanëve” hasën në vesh të shurdhër te gjyqtari kryesor i ndeshjes, i cili pasi bisedoi me dy kapitenët, e vazhdoi ndeshjen normalisht.
Madje, gjatë tërë ndeshjes, tifozët e Greqisë nuk i ndalën provokimet ndaj Kosovës, si me flamurin e Serbisë prezent, apo me përleshje fizike me ta, gjuajtje me shishë, e gjuajtje fishekzjarrësh drejt tifozëve dardanë.
Gjatë ndeshjes, në tribuna u pa harta e Kosovës e mbuluar me flamurin e Serbisë
![Nuk ka asnjë përshkrim të disponueshëm](https://scontent.fprn13-1.fna.fbcdn.net/v/t1.15752-9/287094278_1480485112367283_7258278277169419266_n.png?_nc_cat=109&ccb=1-7&_nc_sid=ae9488&_nc_ohc=uZ68nJSx1O0AX9YjHtz&_nc_ht=scontent.fprn13-1.fna&oh=03_AVKx6mxWDwP8U-R1yiVX7awUdkvrU266y_cUAdbQ90nyKQ&oe=62CB9736)
Kosova tentoi në minutat e fundit të shënonte golin e barazimit, por nuk pati asnjë rast të rrezikshëm.
Krejt në sekondat e fundit, Saiti nuk arriti ta qetësonte topin në mbrojtje, ku porta ishte e boshatisur dhe Greqia e shënoi edhe golin e dytë.
Mes tensioneve të mëdha si në fushë, ashtu edhe në tribuna, ndeshja u mbyll me fitoren e Greqisë.
Kjo fitore, ia siguron matematikisht pozitën e parë Greqisë, e cila e promovon në Ligën B dhe e dërgon në play-offin për Kampionatin Evropian të vitit 2024.
Në anën tjetër, Kosova mbetet në vendin e dytë me gjashtë pikë dhe e mbyll me humbje grumbullimin e qershorit.