Gjermania i jep shembull Serbisë, 1.1 miliard euro Namibisë për gjenocidin e para 100 vjetëve
Gjermania është pajtuar që t’ia dhurojë Namibisë 1.1 miliard euro për financimin e projekteve për komunitetet e prekura nga gjenocidi Herero-Nama në fillim të shekullit XX. Qeveria e kancelares Angela Merkel tha se shuma është gjest i pajtimit, por jo reparacion i obligueshëm ligjor.
Dhjetëra mijëra burra, gra e fëmijë u qëlluan, u torturuan ose u dërguan në shkretëtirën Kalahari për të vdekur urie nga trupat gjermane mes viteve 1904 dhe 1908, pasi fiset Herero dhe Nama ishin rebeluar kundër sundimit kolonialist në atë që quhej Afrikë Jugperëndimore Gjermane e që sot është Namibi.
Që nga viti 2015, Gjermania ka qenë duke negociuar me qeverinë e Namibisë për atë që e quan përpjekje për t’i shëruar plagët e dhunës historike, shkruan The Guardian, transmeton Gazeta Express.
Të enjten, qarqet zyrtare në Berlin i konfirmuan raportet e medieve namibiane se pas nëntë rundeve të negociatave, të dyja palët janë pajtuar për tekstin e deklaratës së përbashkët dhe për shumën prej 1 miliard e 100 milionë eurosh, e cila do të paguhet për programet ekzistuese të ndihmave gjatë 30 viteve të ardhshme.
Nga shuma e përgjithshme, mbi 1 miliard euro do të dhurohen për projekte të lidhura me reformën e tokave, infrastrukturën rurale, furnizimin me ujë dhe trajnimet profesionale. Rreth 50 milionë euro do të ndahen për një fond për pajtim mes dy shteteve, përfshirë projektet kulturore dhe programet për shkëmbim për të rinjtë.
Në tekstin e deklaratës së përbashkët do të thuhet se krimet e kryera nga trupat gjermane kanë qenë gjenocid. Të premten, ministri gjerman i Punëve të Jashtme, Heiko Maas, e mirëpriti marrëveshjen.
Ky shembull mes Gjermanisë dhe Namibisë dhe shembulli i presidentit Makron të Francës me Ruandën, i cili të enjten i kërkoi falje këtij shteti për rolin e vendit të tij në gjenocidin e vitit 1994, janë leksion për Serbinë, e cila më shumë se dy dekada pas përfundimit të luftës në Kosovë po vazhdon t’i mohojë krimet e kryera dhe po refuzon të kërkojë falje apo të ofrojë dëmshpërblim financiar për shkatërrimet masive të shtëpive e infrastrukturës në Kosovë më 1998 e 1999.
