Gjendet e vdekur e reja nga Deçani, dyshohet për vetëvrasje
Kosova është tronditur këtë vikend nga dy ngjarje të rënda në Rrafsh të Dukagjinit.
Pas vrasjes së dyfishtë në Vitomericë të Pejës, është gjetur edhe një trup tjetër i pajetë.
Bëhet fjalë për një femër, e cila u gjet e vdekur në Gllogjan të Pejës. Këtë e ka konfirmuar për Indeksonline zëdhënësi i Policisë në Rajonin e Pejës, Fadil Gashi, i cili edhe ka dhënë detaje në lidhje me rastin.
“Sot në orët e mëngjesit, pas orës 06 e 10 minuta, policia është njoftu për një rast në fshatin Gllogjan. Kur ka arrit në vendin e ngjarjes, e ka gjet një trup të pajetë, vdekjen e ka konstatu edhe mjeku i Qendrës së Mjekësisë Familjare.
Janë kryer të gjitha procedurat policore, njësitet kompetente të gjitha kanë dalë në vendin e ngjarjes. Prokurori i shtetit dhe me urdhër të tij, është dërgu për obduksion në Institutin e Mjekësisë Ligjore”, ka thënë ai.
Sipas Gashit, viktima është e moshës rreth 20-vjeçare, derisa dyshohet se e njëjta ka kryer vetëvrasje.
