Gashi: Duhet të shtohen projektet që kontribuojnë në rritje të punësimit
Ministri i Kulturës, Rinisë dhe Sportit në dorëheqje, Kujtim Gashi, sot në kabinetin e tij në një ceremoni solemne ka bërë shpërndarjen e kontratave për Organizatat Jo-qeveritare që veprojnë si ofruese të trajnimeve me projektet e tyre që kontribuojnë në rritjen e punësimit përmes ofrimit të shërbimeve cilësore për punësimin e të rinjve të moshës 18-24 vjeç.
Ministria e Kulturës Rinisë dhe Sportit këtë program e ka mbështetur financiarisht me 200 mijë euro.
Gjatë kësaj ceremonie, ministri Gashi tha se projektet e tilla do t’i ndihmojnë të rinjtë në fushën e punësimit përmes panaireve që do të organizohen.
“Këto projekte do t’i ndihmojnë të rinjtë në fushën e punësimit përmes panaireve që do të organizohen, po ashtu, përmes promovimit dhe ndërgjegjësimi të rinisë për orientim në karrierë dhe treg adekuat të punës, gjithashtu programet dhe projektet që kanë për qëllim nxitjen e punësimit të të rinjve si dhe trajnimeve afatshkurta profesionale për të rijnë” tha ai.
Tutje, ai ka shtuar se janë të përkushtuar që rinisë t’iu ofrohet sa më shumë përkrahje, në mënyrë që të arrihen qëllimet përmes programeve që i ofron ky projekt.
“Ne kemi një orientim të ri sa i përket rinisë, vetëm për një qëllim, që t’u dalim në ndihmë dhe përkrahje dhe t’i ndihmojmë në çështjen e punësimit sepse rinia është pasuria më e madhe e Kosovës”, ka shtuar ai.