Fjalët e para të Albin Kurtit në Londër
Në Samitin e Londrës, marrëveshja për linjë hekurudhore mes Kosovës e Serbisë është konsideruar si një nga çështjet kyçe për Kosovën. Kryeministri Albin Kurti ndërkaq ka folur për investimet e diasporës.
Në Samitin e Bankës Evropiane për Rindërtime dhe Zhvillim (BERZH) për investime në Ballkanin Perëndimor, kanë filluar diskutimet, ndërsa paneli përbëhet nga liderët e gjashtë shteteve ballkanike. Kosovës e përfaqëson Kryeminsitri Kurti, ndërsa Serbinë, kryeministrja Ana Bërnabiq.
Në postimet e BERZH-it në Twitter, marrëveshjen për linjë hekurudhore e kanë quajtur “linjë veri-jug”.
“Lidhja rajonale veri-jug, bashkëpunimi rajonal nën kornizat e integrimit në Bashkimin Evropian, janë çështje kyçe për Kosovën”, shkruan në postimin e BERZh-it.
Ndërkaq Kryeministri Kurti nuk i ka përkrahur marrëveshjet e fundit me Serbinë për linjën hekurudhore dhe ndërtimin e autostradës, duke thënë se ato u nënshkruan pa dijeninë e Qeverisë.
Kryeministri në fjalën e tij, citohet të ketë folur për diasporën që Kosova e ka dhe për investimet e tyre.
“Ne kemi një diasporë të madhe dhe investimet nga ta do ta ndihmonin Kosovën tejet shumë”, ka thënë Kurti.
BERZH bën të ditur se këtë vit do të investojë një miliard euro në shtetet e Ballkanin Perëndimor.
Kurti si kryeministër është ulur për herë të parë krah homologes së tij serbe.
#EBRDwb: regional #inter connectivity north south 🚆 railway, regional cooperation in the framework of 🇪🇺 EU integration are key for Kosovo 🇽🇰
“We have enormous diaspora and investments from them would help Kosovo 🇽🇰 enormously, “says @albinkurti pic.twitter.com/fSieleiEdr
— The EBRD (@EBRD) February 24, 2020
Kurti në këtë Samit është takuar për herë të parë me homologen serbe, Ana Brnabiq.
Ky organizim pritet të nxjerrë në pah mundësitë për investime në Ballkanin Perëndimor dhe të promovojë projektet rajonale.
Aktualisht BERZH në rajonin e Ballkanit Perëndimor ka investuar mbi 12 miliardë euro.
Samiti do të fillojë me një seancë të nivelit të lartë për të diskutuar vizionin e përgjithshëm për rajonin e Ballkanit Perëndimor si dhe mundësitë për investime. Kjo do të pasohet me një panel diskutimi për “Energjinë e gjelbër në Ballkanin Perëndimor”.