Dr. Anthony Fauci tha se shpërndarja e dozave përforcuese të vaksinës Pfizer/BioNTech mund të fillojë këtë muaj, ndërsa miratimi dhe shpërndarja e dozave përforcuese të vaksinës Moderna mund të zgjasin pak më shumë.

Fauci tha se të dy përforcuesit supozohet të jenë të sigurt, por shtoi se Administrata e Ushqimit dhe Barnave e SHBA-së (FDA) dhe zyrtarë të tjerë janë duke i studiuar të dhënat për t’u siguruar.

Më 18 gusht, zyrtarët shëndetësorë amerikanë, duke u thirrur në studimet e bëra, kanë thënë se mbrojtja nga vaksinat Pfizer/BioNTech dhe Moderna bie me kalimin e kohës.

Autoritetet kanë rekomanduar që njerëzit të marrin vaksinën e tretë Pfizer/BioNTech ose Moderna tetë muaj pas marrjes së vaksinës së dytë dhe kanë caktuar 20 shtatorin si datë që furnizuesit të fillojnë shpërndarjen.

Shkencëtarët janë ende duke debatuar se sa imunitet kundër coronavirusit sigurojnë dozat përforcuese dhe nëse të gjithë amerikanët duhet t’i marrin ato apo vetëm ata me imunitet të komprometuar dhe të moshuarit.

Dozat përforcuese kanë shkaktuar polemika gjetkë, pasi coronavirusi vazhdon të vrasë njerëz të pavaksinuar në të gjithë botën.

Drejtori i përgjithshëm i Organizatës Botërore të Shëndetësisë, Tedros Adhanom Ghebreyesus, ka thënë se punonjësit shëndetësorë në shumë vende nuk janë ende të vaksinuar as me dozën e parë.

Por, shumë vende të pasura kanë pasur vështirësi në vaksinimin e mjaftueshëm të popullsisë së tyre, për të shuar pandeminë.

Autoritetet amerikane kanë thënë se Shtetet e Bashkuara kanë furnizime të mjaftueshme për të shpërndarë doza përforcuese te populli amerikan dhe për të vazhduar dërgimin e dozave në vendet e tjera.

Izraeli tashmë është duke ofruar doza përforcuese për njerëzit mbi moshën 50 vjeç.

Më 1 shtator, Franca është bërë vendi i parë i madh i Bashkimit Evropian që ka nisur të japë doza përforcuese për njerëzit mbi 65 vjeç dhe ata me imunitet të dobët.