Benzina në Gjermani 1,712 euro për litër
Eurozona po përballet me nivele të larta të normës së inflacionit. Janarin e këtij viti, çmimet e konsumit u rritën me 5,1 përqind krahasuar me të njëjtën periudhë të vitit të kaluar, e kjo përbën vlerën më të lartë të inflacionit të regjistruar ndonjëherë që prej futjes në përdorim të monedhës së përbashkët në vitin 1999.
Ekspertët e ekonomisë thonë se ky kapërcim i beftë i normës së inflacionit përbën një goditje të fortë dhe për Bankën Qendrore Europiane. Krahasuar me një muaj më parë, çmimet e konsumit të përgjithshëm janë rritur me 0,3 për qind, ndërkohë që parashikimet kishin qenë për një ulje me 0,4 përqind. Duket se një nga faktorët kryesorë që ka ndikuar në këtë përkeqësim të situatës, është energjia.
Çmimet e saj u rritën jashtëzakonisht shumë, me gati 30% krahasuar me të njëjtin muaj të vitit të kaluar. Në Gjermani, benzina E10 është më e shtrenjtë se kurrë. Këto ditë, cmimi mesatar i saj në vend shënonte 1,712 euro për një litër.
Ky konsiderohet niveli më i lartë i çmimit të benzinës në vend që prej shtatorit 2012, kur ishte 1.709 Euro. Ushqimet dhe pijet po kështu janë rritur këtë muaj. BQE nuk e parashikon ende rritjen e normave të interesit, por ne tregjet financiare po spekulohet edhe kjo mundësi.
