Bëhen për spital çifti nga Ferizaji pas përleshjes me thika mes vete
Zënka mes një çifti në Ferizaj, mëngjesin e sotëm, ka përfunduar me lëndime. Çifti kanë përfunduar në spital, derisa personi i gjinisë mashkullore kishte rezultuar i kërkuar nga Policia. Në momentin e përleshjes, çifti dyshohen se kishin qenë nën ndikimin e alkoolit.
Një zënkë mes një çifti në Ferizaj, është pasuar me rrahje mes tyre. Por, nuk ka mjaftuar me aq. Çifti kanë përdorur edhe thikat gjatë përleshjes, duke i shkaktuar njeri tjetrit gërvishtje në trup.
Fjala është për një mashkull kosovar dhe një femër nga Shqipëria.
Ngjarja ka ndodhur në mëngjesin e së martës, pa zbardhur drita, në një lagje jo shumë larg qendrës së qytetit të Ferizajt.
Çifti, të dy kanë përfunduar për trajtim mjekësorë, në emergjencën e spitalit rajonal të këtij qyteti.
Rastin është duke e trajtuar Policia e Kosovës.
Këta të fundit, zbuluan se personi i gjinisë mashkullore, i përfshirë në rast, ka qenë i kërkuar nga Policia e Pejës, për një rast tjetër penal.
Reporteri.net merr vesh se çifti, në momentin e përleshjes, gjatë të cilës përdoren edhe thikat, dyshohen të kenë qenë nën ndikimin e alkoolit.
Behet e ditur se thikat e përdorura janë konfiskuar në vend ngjarje, derisa banesa ku ndodhi rasti u gjet në gjendje të konsiderueshme të demoluar, si pasojë e zënkës së dhunshme.
Rasti po hetohet në procedurë të rregullt nga Polica e Prokuroria e Ferizajt, derisa është duke u trajtuar si rast i “Lëndimit Truporë”.
