BE-ja ndihmon Ukrainën me 18.1 miliardë euro – para nga fitimet e aseteve të ngrira ruse
Bashkimi Evropian sot konfirmoi se do t’i japë Ukrainës 18.1 miliardë euro (19 miliardë dollarë) si pjesë e një huaje më të madhe nga G7, e mbështetur nga fitimet e aseteve të ngrira ruse.
Grupi i Shtatë ekonomive të përparuara muajin e kaluar finalizoi një marrëveshje për një hua prej 50 miliardë dollarësh për Kievin, për të ndihmuar vendin ndërsa përballet me luftën kundër pushtimit të Moskës.
Shtetet e Bashkuara u angazhuan të sigurojnë 20 miliardë dollarë nga këto fonde, ndërsa Mbretëria e Bashkuar, Kanada dhe Japonia gjithashtu ranë dakord të kontribuojnë. BE-ja fillimisht kishte deklaruar se ishte e gatshme të ofronte deri në 36 miliardë euro përpara se partnerët e saj të G7-ës të shpallnin pjesën e tyre.
Zyrtari i lartë i BE-së, Valdis Dombrovskis, shkroi në platformën X (ish-Twitter) se kishte nënshkruar një memorandum mirëkuptimi me Kievin për 18.1 miliardë euro “për të ndihmuar Ukrainën të mbulojë nevojat e menjëhershme”.
BE-ja ka ngrirë rreth 235 miliardë dollarë nga fondet e bankës qendrore ruse që kur Kremlini nisi pushtimin e Ukrainës në vitin 2022, shumica dërrmuese e aseteve të ngrira ruse në mbarë botën.
Rreth 90 për qind e këtyre fondeve në BE mbahen nga organizata ndërkombëtare e depozitave Euroclear, me bazë në Belgjikë.
Fondet e fundit të BE-së i shtohen rreth 120 miliardë eurove mbështetje që zyrtarët thonë se BE-ja dhe shtetet anëtare të saj i kanë siguruar Ukrainës që nga pushtimi i Rusisë.
