Arrestohet një gjykatës, kapet në flagrancë duke marrë ryshfet prej mijëra euro
Pas disa ditë pune hetimore, njësitet e Policisë së Kosovës kanë arrestuar një person nën dyshimin për kryerjen e veprës penale të keqpërdorimit të pozitës apo autoritetit zyrtar, si dhe marrje e ryshfetit dhe mbajtjen në pronësi, kontroll ose posedim të paautorizuar të armëve.
Në fakt i arrestuar është një gjykatës nga Peja, i cili thuhet se fillimisht kishte marrë ryshfet 4 mijë euro për të kryer një punë dhe mandej është kapur në flagrancë duke marrë edhe shumën tjetër prej 2 mijë euro.
Në një njoftim për media Drejtoria për Hetimin e Krimeve Ekonomike dhe Korrupsionit në Prishtinë, thotë se ka pranuar informacione nga viktima, që ka pasqyruar abuzimin e funksioneve gjyqësore, veprime që diskreditojnë pozitën dhe figurën e gjyqtarit si dhe imazhin e sistemit gjyqësor.
Gjatë procesit të hetimit preliminar janë ndërmarrë masat adekuate për të identifikuar formën e aplikuar më parë të korrupsionit nga i inkriminuari. Në koordinim me Prokurorinë Speciale janë aplikuar praktikat e njohura nga Kodi i Procedurës Penale, duke u mbështetur fuqishëm në një hetim profesional të bazuar në dëshmi.
Sipas policisë, gjatë aplikimit të masave hetimore janë siguruar se i inkriminuari ka kërkuar realizimin e ofertës, në atë mënyrë që i njëjti kërkon/pranon përfitimin material, (kohë më parë dyshohet se janë dorëzuar nga viktima dhe janë pranuar nga i dyshuari i lartshënuar katër mijë (4.000.00) euro), në mënyrë të drejtpërdrejtë, në mënyrë që mos të veprojë në pajtim me detyrën e tij zyrtare, në cilësinë e gjyqtarit.
“Gjatë operacionit policor, të zhvilluar me datën 19 shtator 2019, i inkriminuari ka kërkuar/pranuar shumën prej dymijë (2.000.00) eurove, për të përmbyllur ofertën e precizuar në proces për të finalizuar shumën prej gjashtëmijë (6.000.00) eurove, në lidhje me lëndën/çështjen penale të përmbyllur me aktgjykim kohë më parë”, njofton policia.
Pas arrestimit i dyshuari është kontrolluar në prezencën e avokatit mbrojtës, në zyrën e NJRHKEK-së Pejë, me ç’rast i janë gjetur në xhep paratë dymijë (2.000.00) euro, të cilat janë përdorur për aplikimin e masës së fshehtë ‘simulim i veprës së korrupsionit’.
Me aprovim verbal të prokurorit, është kontrolluar banesa e të dyshuarit, ku janë gjetur dhe janë sekuestruar:
- një armë zjarri, tipi Zaza-min, kalibër: 8mm
- një karikator dhe dhjetë (10) fishekë të kalibrit 8mm
- dhjetëmijë euro (10.000.00) euro
- shkresa, aktgjykime dhe proces verbale gjyqësore
Me urdhër të prokurorit special, i dyshuari është ndaluar në qendër të mbajtjes për 48 orë.