Anëtari kroat i Presidencës së Bosnjës: Kosova është shtet, fundi i tregimit

Anëtari kroat i Presidencës së Bosnjë dhe Hercegovinës, Zheljko Komshiq ka thënë se Millorad Dodik e kundërshton njohjen e Kosovës, por sipas tij kjo çështje ka marrë fund.

Ai shton se anëtari serb i Presidencës së Bosnjës-Hercegovinës, Millorad Dodik më parë e pranoi gjenocidin në Srebrenicë dhe më pas ndryshoi tregimin.

I pyetur se a po përgatitet Bosnja ta njohë Kosovën, Komshiq në një intervistë për Deutsche Welle shprehet se nuk  ka një marrëveshje të tillë në nivelin e Presidencës dhe se siç tha ai “kjo nuk është një gjë e panjohur”.

“Dodik kundërshton fuqishëm këtë, megjithëse – nëse do të jeni realist dhe pragmatik – Kosova është një shtet. E kryer. Ky është fundi i tregimit. Ne thjesht po presim që Beogradi ta pranojë atë fakt, ta pranojë dhe atëherë gjërat do të jenë më të lehta. Tani jemi dëshmitarë të  protestave. Pandemia e koronës u përdor për një lloj rebelimi dhe thuhej se ishte një protestë kundër futjes së shtetrrethimit”, tha ai, përcjell klankosova.

“Pas disa çastesh, ishte e qartë se nuk kishte asnjë lidhje me pandeminë, por se kishte të bënte me Kosovën, sepse gjithçka që pamë në pamjet që vinin nga Beogradi, tregon se ekziston madje një strukturë e organizuar politike, e cila fshehu qëllimin duke folur për koronën që ishte për të parandaluar një marrëveshje midis Beogradit dhe Prishtinës”, tha ai.