Aktori Baldwin gjatë xhirimeve vrau një grua, deklarohet bashkëshorti i saj
Bashkëshorti i Halyna Hutchins ka folur sot për “humbjen gjigante” të gruas së tij, e cila u vra në sheshxhirim nga arma e aktorit Alec Baldwin.
Matt Hutchins ka postuar një foto të Halyna dhe djalit të tyre tetë-vjeçar Andros me koment “humbja jonë është e pamasë”.
“Halyna na frymëzonte të gjithëve me pasionin e vizionin e saj, ajo la një trashëgimi që nuk mund të përmblidhet me fjalë” ka shkruar ai.
Familja e gruas tragjike po kërkon tashmë përgjigje për vdekjen absurde, duke thënë se ishin përballur me shumë burokraci që ajo të fluturonte drejt ShBA-së.
Miqtë e viktimës thonë se babai Antoly e nëna Olga janë të përfshirë nga dhimbja, pasi u njoftuan për tragjedinë nga bashkëshorti Matthew.
Një mik i saj në Kiev, ku Halyna ishte rritur, tha: “Familja është në zi, por në të njëjtën kohë ata kanë pyetje për të cilat kërkojnë përgjigje”.
“Ata nuk e kuptojnë si mund të ndodhë diçka e tillë, me masat e sigurisë që supozohet se merren”, shtoi ai.
Krerët e studiove filmike tremben nga një padi e fuqishme e familjes nëse rezulton se vdekja e saj mund të ishte evituar.
Bashkëshorti Matthew thotë se është duke ngushëlluar djalin e tyre Andros në shtëpinë e tyre në Kaliforni.
Halina ishte diplomuar në universitetin e Kiev për gazetari dhe kishte punuar si producente dokumentarësh dhe për BBC, raportojnë mediat e huaja.
Dje motra e saj Svetlana, e cila jeton në Indonezi, tha: “Ende nuk e kuptoj dot, e doja aq shumë, ajo ishte shembulli im. Është një dhimbje e madhe për familjen, shpresoj koha do të shërojë dhimbjen tonë”.
Ministrja e jashtme e Ukrainës i ka kërkuar diplomatëve në San Francisco të hetojnë rrethanat e vdekjes së saj.
“I kemi kërkuar konsullatës së Ukrainës në San Francisco të qartësojë rrethanat e ngjarjes e të bashkëpunojë me përfaqësuesit amerikanë. Konsullata do të japë të gjithë mbështetjen për familjarët e të ndjerës”.
