Aeroporti i Prishtinës thyen rekord, paralajmëron linja të reja të fluturimeve
Aeroporti ndërkombëtar i Prishtinës “Adem Jashari” vazhdon të thyejë rekorde. Vetëm dy muajt e parë të vitit 2019, nëpër këtë aeroport kanë kaluar mbi 300 mijë udhëtarë, shifër kjo e cila në muajt e njëjtë të vitit paraprak, ishte më e vogël.
Nga Aeroporti i Prishtinës kanë bërë me dije se në periudhën janar, shkurt, të këtij viti numri i udhëtarëve është rritur për 14.7 për qind, kurse numri i fluturimeve është rritur për 16.3 për qind, shkruan FaktePlus.
“Gjatë dy muajve të parë të vitit 2019 kemi shërbyer 307,048 udhëtarë, shifër kjo e cila në raport me periudhën e njëjtë të vitit të kaluar është rritur për 14.7 për qind. Ndërkaq, janë realizuar 2350 fluturime në vajtje/ardhje, apo 16.3 për qind më shumë se gjatë dy muajve të parë të vitit paraprak”, thuhet në një përgjigje dhënë Agjencisë së Lajmeve FaktePlus, nga zyrtarë të aeroportit të Prishtinës.
Po ashtu, zyrtarë nga aeroporti i Prishtinës, kanë pohuar se edhe në këtë verë do të ketë risi sa i përket linjave të reja të fluturimeve.
“Kompania jonë në vazhdimësi ofron kushte të përshtatshme për rritjen e trafikut ajror kryesisht me anë të programeve nxitëse të aprovuara nga Autoriteti i Aviacionit Civil në Kosovë si dhe me përmirësimin e shërbimeve të ofruara. Gjatë vitit të kaluar kemi hapur disa linja të reja dhe frekuenca shtesë, ndërkaq parashihet që edhe sezona verore e këtij viti të fillojë me risi”, thuhet në përgjigjen e tyre.
Ndryshe për shkak të koncentrimit më të madh të diasporës kosovare në shtetin e Gjermanisë dhe Zvicrës edhe shumica e fluturimeve nga Aeroporti ndërkombëtar “Adem Jashari” kanë destinacion këto dy shtete.
Sipas të dhënave zyrtare, Zvicra është e para me 30-32 për qind të fluturimeve në vit, me linjat Cyrih, Gjenevë dhe Bazel.
Kujtojmë se Aeroporti Ndërkombëtar i Prishtinës “Adem Jashari” edhe në muajin dhjetor të vitit të kaluar ka arritur shifrën rekord me shërbime ndaj udhëtarëve. Në këtë aeroport kanë marrë shërbim vitin e kaluar mbi 2 milionë udhëtarë./FaktePlus