Sot hapet aplikimi për subvencione për bujqit, mbështeten 27 sektorë
Sot hapet aplikimi për subvencione për kulturat dhe aktivitetet bujqësore për gjithë Kosovën.
Imer Limani – u.d. i drejtorit të pagesave direkte në Ministrinë e Bujqësisë, Pylltarisë dhe Zhvillimit Rural (MBPZhR), ka bërë me dije se sot më 26 prill hapet periudha e aplikimit për pagesa direkte/subvencione për kulturat dhe aktivitetet bujqësore të cilat mbështeten përmes programit të pagesave direkte/subvencioneve për vitin 2022.
“Nga sot të gjithë fermerët e Kosovës mund të aplikojnë në drejtoritë komunale për bujqësi, këtë vit do të mbështeten 27 sektor të bujqësisë, pra të gjithë sektorët do të mbështetet. Fermerët mund të aplikojnë deri më 25 Maj të këtij viti. Pra të ata gjithë do të mund të aplikojnë dhe nuk do t’i humb asnjë fermeri afati për aplikim për përkrahje”, tha ai sot për televizionin publik.
Sipas tij këtë vit ka rritje të buxhetit për pagesa direkt. “Këtë vit kemi ndryshim. Përmes Programit për Pagesa Direkte për vitin 2022 është planifikuar një buxhet prej 5 milionë eurosh për subvencionimin e naftës, përkthyer në 0.36 centë për litër dhe 8 milionë euro për inputet bujqësore për plehërim pranveror për 4 kultura bujqësore, grurë të përkthyer në 150 euro për hektar, misër, patate dhe fasule përkthyer në 100 euro për hektar”, theksoi ai.
Në kuadër të PPD-së për vitin 2022 është rritur përkrahja 216 % për grurin, 119 % për misrin, 118 % për pataten dhe fasulen, 85 % për perimet në fushë të hapur, 100 % për perimet në sera, 33 % për bletët, 26 % për kulturat pemëtare, 25 % për mjedrën, 21.6 % për farën e grurit, 16 % për qumështin sipas cilësisë, si dhe rritje të konsiderueshme për shumicën e sektorëve dhe nën sektorëve të paraparë me Programin e Pagesave Direkte 2022.
Imer Limani – u.d. i drejtorit të pagesave direkte në Ministrinë e Bujqësisë, Pylltarisë dhe Zhvillimit Rural (MBPZhR), vlerësoi se kjo mbështetje do të jetë ndihmesë e madhe për bujqit për shkak të rritjes së çmimeve të produkteve bazë që nevojiten për kultivimin në bujqësi.
“Shpresoj të rritet edhe numri fermerëve që do të aplikojnë për të përfituar nga subvencionet në bujqësi”, tha ai.
