McCarthy: Kurti dhe Vuçiq duhet të jenë më të moderuar nëse dëshirojnë marrëveshje
Paul McCarthy, drejtor për Evropën në Institutin Ndërkombëtar Republikan, beson se presidenti serb Aleksandar Vuçiq duhet të arrijë një marrëveshje me Kosovën, nëse dëshiron të ulet në karrigen e Brukselit.
McCarthy deklaroi se Vuçiq tani ka një opozitë të krahut të djathtë, duke vënë në dukje se edhe Ivica Daçiq e pozicionoi veten disi në një mënyrë më të papërshtatshme në raport me Vuçiqin.
Sipas McCarthy, Vuçiq është i vetëdijshëm se duhet të arrijë marrëveshje me Kosovën.
“Duket sikur ai është më i moderuari tani dhe ka mundësi që ka humbur një pjesë të votuesve për shkak të kësaj – Vuçiq është i vetëdijshëm se duhet të arrihet një marrëveshje me Kosovën nëse dëshiron të vazhdojë të ulet në karrigën e Brukselit, ngjashëm është edhe më Bosnjën, ai po pretendon publikisht se nuk po përpiqet të minojë integritetin e Bosnje-Hercegovinës dhe ne nuk kemi zgjidhje tjetër përveç se ti besojmë”, tha McCarthy.
McCarthy theksoi se është e nevojshme në procesin e dialogut që Kurti dhe Vuçiq të takohen në gjysmë të rrugës, për të arritur përparim.
“Është e rëndësishme që Prishtina dhe kryeministri Kurti t’i qaset kësaj çështjeje nga një pozicion më i moderuar. E vetmja mënyrë është që Kurti të takohet me presidentin serb në gjysmë të rrugës. Momentalisht nuk ka kurrfarë të arritura në procesin e dialogut, sepse mendoj se Kurti është pozicionuar në një cep , gjë që kufizon aftësinë e tij për të manovruar. Deklaratat e shumta tregojnë për një pozicion të tillë. Të dyja palët janë fajtorë dhe mendoj se tani që zgjedhjet janë pas nesh, është e rëndësishme të veprojnë në mënyrë më të moderuar në mënyrë që të arrihet një marrëveshje,” ka shtuar ai.
McCarthy thekson se është shumë ambicioze të pritet që negociatat të përfundojnë në katër vitet e ardhshme, për shkak të mosmarrëveshjeve të mëdha.
“Unë mendoj se Perëndimi duhet të përfshihet më drejtpërdrejt në negociata. Ndoshta do të ofrojë disa karota në proces që do t’i lejojë të dyja palët t’i tregojnë publikut dhe votuesve të tyre se nuk janë dorëzuar. Kjo është veçanërisht e rëndësishme për Kosovën sepse kryeministri Kurti , i cili po kritikohet se nëpërmjet dialogut ai po heq dorë nga një pjesë e sovranitetit të Kosovës”, tha McCarthy