Lavrov flet për një rend të ri botëror me Kinën, çfarë paralajmëroi në Pekin
Përpara një takimi me homologun kinez Wang Li, Ministri i Jashtëm rus, Sergei Lavrov tha se Moska dhe Pekini po punojnë së bashku për ta hapur rrugën për një “rend të drejtë botëror”.
Kjo është vizita e parë e Lavrov në Kinë që kur Rusia nisi pushtimin e Ukrainës në fund të shkurtit.
Në një video të publikuar nga Ministria e Jashtme ruse përpara takimit, Lavrov tha se bota “po kalon një fazë shumë serioze në historinë e marrëdhënieve ndërkombëtare”.
Në fund të këtij procesi, Lavrov tha, “ne, së bashku me ju (Kinën) dhe simpatizantët tanë, do të shkojmë drejt një rendi botëror multipolar, të drejtë dhe demokratik”.
Ndryshe nga shumë vende, Kina ka refuzuar ta dënojë pushtimin rus të Ukrainës. Zyrtarët amerikanë e kanë akuzuar Pekinin për “gatishmëri sinjalizuese” për ta ndihmuar Rusinë, si ushtarakisht ashtu edhe ekonomikisht, përcjell Gazeta Express.
Presidenti i SHBA-së Joe Bide e krahasoi pushtimin rus të Ukrainës me shtypjen e dhunshme të protestave të studentëve në Sheshin Tiananmen në vitin 1989 nga Kina.
Kina dhe Rusia janë afruar më shumë vitet e fundit. Presidenti rus Vladimir Putin ishte i pranishëm në ceremoninë e hapjes së Lojërave Olimpike disa javë para fillimit të pushtimit të Ukrainës.