Marrëveshje me Serbinë për rrymën në veri, Lajçak e fut në agjendë të dialogut kërkesën e Blinkenit
Përfaqësuesi special i Bashkimit Evropian për dialogun Kosovë-Serbi, Miroslav Lajçak ka thënë se çështja e rrymës në veri do të jetë në agjendën e takimit të radhës.
Lajçak në një për Gazetën Express tha se letra e Sekretarit Blinken, ku ky i fundit kërkoi marrëveshje për punën e energjisë elektrike në veri të Kosovës, është një fakt tjetër se sa afër janë SHBA-ja dhe BE-ja në bashkëpunim.
“Letra e Sekretarit Blinken është edhe një fakt tjetër se sa afër janë ShBA’ja dhe Bashkimi Evropian në bashkëpunim. Ai ka ngritur një numër çështjesh, të cilat janë adresuar në dialog dhe në linjë me dialogun. Po, çështja e rrymës në veri është njëra nga to dhe gjithashtu edhe çështja e personave të zhdukur. Ai gjithashtu thotë se duhet mbajtur zotimet e kaluara dhe duhet që të shmangen veprimet apo retorika që mund t’i rrisë tensionet dhe më lejo të them që kjo vlen për të dyjat, Kosovën dhe Serbinë”, tha ai.
Tutje, Lajçak shtoi se çështjen e rrymës janë duke e diskutuar rregullisht në takimet me zëvendëskryeministrin, Besnik Bislimi dhe kryeministrin Kurti.
“Dhe po, ne po diskutojmë për çështjen e rrymës, rregullisht, në çdo takim me z. Bislimi, z.Kurti dhe gjithashtu me partnerët në Beograd. Ne jemi duke diskutuar edhe për çështjen e personave të pagjetur dhe sigurisht që ajo do të jetë në agjendën e takimit të radhës, logjikisht, sepse duhet ta diskutojmë këtë çështje”, shtoi Lajçak.
Pa dashur të tingëllojë tepër optimist, Lajçak tha se beson që do të arrihet marrëveshje sa i përket energjisë elektrike duke theksuar se të gjithë e kuptojnë seriozitetin e kësaj çështjeje.
“Po, unë vërtet besoj. Duhet gjetur një marrëveshje shpejt dhe ne kemi bërë progres për këtë dhe mendoj që po. Nuk dua të tingëlloj tepër optimist, por vërtet besoj se mund të kemi një marrëveshje për këtë dhe të gjithë e kuptojnë seriozitetin e kësaj çështjeje”, tha Lajçak.