Studimi: Një në katër persona që kanë kaluar Covid-19 vuajnë nga probleme shëndetësore të vazhdueshme
Rreth një në katër persona që kanë kaluar koronavirusin vuajnë nga probleme shëndetësore, nga të cilat nuk vuanin para se të infektoheshin me Covid-19, sipas një studimi amerikan, që analizoi të dhënat mjekësore të rreth dy milionë personave që kishin kaluar infeksionin.
Dy problemet kryesore me të cilat përballen këta pacientë janë dhimbja (nevralgji, mialgji) dhe vështirësi në frymëmarrje
Ky është studimi më i madh i kryer ndonjëherë për të shqyrtuar efektet afatgjata të sëmundjes, tha Fair Health , një organizatë e pavarur që mblodhi informacion nga kompanitë e sigurimeve.
“Megjithëse shumë pacientë shërohen nga Covid-19 brenda disa javësh, disa zhvillojnë simptoma të vazhdueshme ose të reja më shumë se katër javë pasi janë diagnostikuar”, shkruhet në studim.
Dy problemet kryesore me të cilat përballen këta pacientë janë dhimbja (nevralgji, mialgji) dhe vështirësi në frymëmarrje.
Më konkretisht, më shumë se 23% e pacientëve të cilët u shëruan nga Covid-19, kishin nevojë për kujdes mjekësor më shumë se një muaj pas infektimit, për një ose më shumë nga problemet e mësipërme shëndetësore.
Ata që ishin të sëmurë rëndë kishin më shumë të ngjarë të kishin probleme të tilla: pothuajse një në dy persona që ishin shtruar në spital kishin të paktën një problem shëndetësor.
Midis atyre me simptoma më të lehta, 27% kërkuan ndihmë mjekësore.
Sidoqoftë vlen të përmendet se gati 19% e rasteve asimptomatike kërkuan ndihmë mjekësore.
Një nga problemet me këtë studim ishte që të dhënat nuk u analizuan nga një grup kontrolli, domethënë nga njerëz që nuk ishin infektuar me Covid-19, në mënyrë që të krahasonin rezultatet.
