Në Shtetet e Bashkuara janë 25 milionë të infektuar me COVID-19
Në Shtetet e Bashkuara, numri i njerëzve të infektuar me koronavirus të ri të dielën tejkaloi zyrtarisht 25 milionë që nga fillimi i pandemisë, ditë pasi Joe Biden mori presidencën, duke e vendosur luftën kundër COVID-19 në krye të listës së përparësive të tij.
Universiteti Johns Hopkins numëroi 25,003,695 të infektuar sot në mëngjes me kohë lokale. Më shumë se 417,000 njerëz kanë vdekur nga COVID-19, sipas të njëjtit burim.
Shtetet e Bashkuara janë vendi që pësoi më shumë në pandemi në numra absolutë.
Pas kulmit të epidemisë më 12 janar, mesatarja javore e infeksioneve të reja fillon të bjerë, tregojnë të dhënat nga Projekti i Ndjekjes së Covid. Numri i të vdekurve ndjek një kurbë të ngjashme.
Qendrat për Parandalimin dhe Kontrollin e Sëmundjeve (CDC), agjencia kryesore federale e shëndetit publik në SHBA, tani parashikon që deri më 13 shkurt, midis 465,000 dhe 508,000 amerikanë do të vdesin nga COVID-19.
Në rrethana të tilla, Joe Biden përfshiu luftën kundër pandemisë midis përparësive të mandatit të tij. Administrata e tij të enjten lëshoi udhëzime të gjera për trajtimin e pandemisë që mbështetet në vaksinimin dhe gjurmimin e kontakteve të të infektuarve.
Ai gjithashtu planifikon të kërkojë nga Kongresi një paketë ndihme emergjente 1.9 trilionë dollarë që përfshin 20 miliardë dollarë për vaksinat dhe 50 miliardë dollarë për teste.
Demokrati është zotuar të administrojë 100 milionë doza të vaksinës në njëqind ditët e para të mandatit të tij.
Vendi gjithashtu shpreson të miratojë vaksinat e reja në javët e ardhshme, duke përfshirë vaksinën Johnson & Johnson, e cila jepet në një dozë të vetme.
