Këta janë 47 kandidatët që nuk do të certifikohen për zgjedhjet e 14 shkurtit
Këto zgjedhje po dalin të jenë jashtë çdo parashikimi.
Këshilli Gjyqësor i Kosovës i ka kthyer përgjigje Komisionit Zgjedhor të Kosovës, rreth emrave të kandidatëve për deputetë.
Burimet e mirë informuara të Syri Kosovës bëjnë më dije se në mesin e 47 kandidatëve figuron edhe emri i kryesuesit të listës zgjedhore të LVV-së, Albin Kurti.
Kurti nuk mund të kandidojnë, pasi është dënuar me veprën penale në tri vitet e fundit.
KQZ në kërkesën e saj dërguar KGJK-së ka kërkuar emrat e personave nga lista e kandidatëve nëse janë shpallur fajtorë për vepër penale me një vendim përfundimtar të gjykatës në tre vjetët e fundit.
KGJK i ka kthyer përgjigje duke e njoftur për 38 emra të kandidatëve për deputet që janë të dënuar me vepër penale.
Përveç Albin Kurtit, aktakuzë aktive kanë edhe Glauk Konjufca, Albulena Haxhiu, Arbërie Nagavci, Mimoza Kusari- Lila, Xhelal Sveçla, Fitore Pacolli, Valon Ramadani, Jetmire Vrenezi, Drita Millaku, Ekrem Mustafa e Sali Zyba.
Kandidatë me aktakuza aktive në listën zgjedhore për zgjedhjet e 14 shkurtit ka edhe Aleanca për Ardhmërinë e Kosovës.
Në AAK janë 8 kandidatë për deputetë me aktakuza.
Time Kadrijaj, Pal Lekaj, Teuta Haxhiu, Haxhi Shala, Meliza Haradinaj- Stublla, Shkumbin Demaliaj, Gani Dreshaj e Rrustem Berisha janë kandidatët për deputetë të AAK- së që kanë aktakuza.
Ndërsa Partia Demokratike e Kosovës i ka 6 kandidatë me aktakuza.
Sadik Halitjaha, Xhavit Haliti, Kujtim Gashi, Ramë Vataj, Lulzim Abazi dhe Bajrush Xhemajli janë kandidatët nga radhët e PDK- së që kanë aktakuza.
Nga Lista Serbe janë dy kandidatë për deputetë me aktakuza. E ata deputetë janë Milan Aritnovic dhe Ivan Todosijevic.
Ndërsa nga Lidhja Demokratike e Kosovës është vetëm një kandidat me aktakuzë. Ai është Sali Asllanaj.
Vendimi i Gjykatës Kushtetuese të 21 dhjetorit prishi balancin politikë kosovar. Përveç që rrëzoi Qeverinë Hoti, në sqarimin e saj dha përfundimi edhe për kandidatët e tjerë për deputete.
Albin Kurti ishte dënuar me 1 vit e 3 muaj burgim për përdorim të armës apo mjetit të rrezikshëm, kurse për veprën penale të pengimit të personit zyrtar është dënuar me gjashtë muaj burgim. Ndaj tij, është shqiptuar dënimi unik prej 1 vit e gjashtë muaj burgim me kusht.
Vendimi thotë se “në bazë të nenit 71.1 të Kushtetutës të Republikës së Kosovës, në ndërlidhje me nenin 29.1 (q) të Ligjit për Zgjedhjet e Përgjithshme, personi i dënuar për vepër penale me një vendim gjyqësor të formës së prerë në tri (3) vitet e fundit, nuk mund të jetë kandidat për deputet e as të fitojë mandat të vlefshëm në Kuvendin e Republikës së Kosovës”, thuhet në vendimin e Kushtetutës.