Promovime të reja në Panairin Vjeshtor të Librit
Rreth 50 shtëpi botuese po marrin pjesë në Panairin Vjeshtor të Librit, i cili është hapur sot në objektin e Kolegjit AAB , me ç’rast dashamirët e librit do të kenë mundësi të kenë në duar titujt më të ri dhe shohin ngjarje artistike dhe aktivitete të tjera.
Panairi do të jetë i hapur nga sot e deri më 7 tetor dhe çdo ditë nga ora 10:00 deri në 18:00 do të ketë edhe transport falas nga qyteti i Prishtinës për në Kolegjin AAB dhe anasjelltas.
Me këtë rast rektori i AAB-së, Lulzim Tafa është shprehur se qëllimi i këtij panairi është që libri të jetë më afër me njeriun.
“Është një panair brenda një universiteti që ka 17 mijë studentë. Edhe pse mbahet në një kampus universitar, nuk ka kufizime dhe është i hapur për të gjithë ata që e duan librin”, deklaroi Tafa.
Panairi është në bashkëpunim më shtëpitë botuese nga Shqipëria, ku gjysma e librave janë nga ky shtet dhe gjysma nga Kosova.
Në kuadër të programit për promovimin e titujve të rinj në Panairin Vjeshtor të Librit AAB 2018, Shtëpia Botuese AAB, promovon librin “Takimi në Junik”, të autorit Hajdin Abazi.
Ky promovim mbahet në këndin Neë York, në Bibliotekën Universitare të Kolegjit AAB.
Kurse autori e gazetari Jusuf Buxhovi do të promovojë vëllimin e 6-të, 7-të dhe të 8-të të veprës kapitale “Kosova”.
Pjesëmarrëse të këtij edicioni të panairit janë rreth 50 shtëpi botuese me botimet e tyre, ndërsa programit të Panairit nuk do t’ i mungojnë edhe promovimet, ngjarjet artistike dhe aktivitete të tjera./FaktePlus