SHBA-të apo BE-ja në krye të dialogut? Murtezaj: Në Paris nuk u fol për ndarje të tillë

Valon Murtezaj, këshilltari për politikë të jashtme i kryeministrit, ka thënë që takimi që ka ndodhur sot në Pallatin Elysee në Paris mes kryeministrit kosovar Avdullah Hoti dhe presidentit francez Emmanuel Macron ka qenë vizita më e lartë bilaterale në 10 vjetët e fundit.

“Ishte një takim i nivelit më të lartë. Gjithçka e organizuar rreth këtij takimi, përfaqësimi, pritja, ceremonia protokollare, niveli më i lartë ishin prezent – të gjitha këto e kanë bërë që kjo vizitë e kryeministrit Avdullah Hoti të jetë vizita më e lartë bilaterale në 10 vjetë e fundit”.

“Më e rëndësishme është që atmosfera e bisedës ishte shumë e mirë, e ngrohtë dhe miqësore. Ishte takim gjithëpërfshirës që zgjati afërsisht një orë dhe u bisedua në mënyrë shumë të afërt. Presidenti [Emmanuel] Macron ishte shumë i afërt, i hapur dhe i drejtpërdrejtë për të gjitha çështjet”.

“Kryeministri i Kosovës prezantoi perspektivat, brengat dhe gjithçka që lidhet me Kosovën në fazën që po kalon dhe perspektivën për të ardhmen”.

Por, a shfaqi presidenti francez gatishmëri që të ndërmjetësojë në dialogun mes Kosovës dhe Serbisë? A e sheh ai Bashkimin Europian si motorin e këtij procesi?

“Dialogu ishte nga pikat kryesore. Natyrisht që Franca bashkë me Gjermaninë si prijëse të proceseve në Europë jo vetëm që e kanë shprehur gatishmërinë, por janë thellësisht të përfshira në këtë proces”.

“Samiti i Parisit që do të mbahet më 10 korrik dhe pastaj aktivitete të tjera u theksua dhe u ritheksua që çështja është si të ecet përpara. Qëndrimi i qartë i kryeministrit të Kosovës ëhstë që ky dialog nuk po fillon tani, ka filluar më parë dhe duhet të marrë kahje ka përmbyllja që rezultati final duhet të jetë njohja e shtetësisë së Kosovës, përndryshe nuk ka kuptim i gjithë ky proces”, tha ai në Klan Kosova.

Është krijuar ideja që është një ‘luftë’ mes Shteteve të Bashkuara të Amerikës dhe Bashkimit Europian se kush do t’i prijë këtij procesi. A është diskutuar një gjë e tillë me presidentin e Francës?

“Në asnjë moment nuk është folur për ndarje të tilla në politikën ndërkombëtare aktuale mes BE-së dhe SHBA-së. Shihet si një proces ku të gjitha palët duhet të jenë pjesëmarrës. Duhet ta kemi të qartë nga perspektiva e Kosovës që ne edhe si gjeografi, kulturë dhe politikë jemi pjesë e Europës, sepse edhe synojmë të jemi pjesë e familjes europiane. Ndërsa në të njëjtën kohë SHBA-të kanë qenë aleati dhe përkrahësi numër një në të gjitha fazat e shtetndërtimit. Prandaj, është e pakuptimtë një qasje që do ta bënte këtë ndarje”.