FSShK-ja për Fitim Havollin: Kërkojmë nga ai që të rri larg nga të drejtat e infermierëve
Federata Sindikale e Shëndetësisë së Kosovës, ka reaguar ndaj kryetarit të Odës së Infermierëve, Fitim Havollit, pasi që ky i fundit tha se me Ligjin e ri të Pagave janë diskriminuar.
FSShK-ja e ka akuzuar Havollin për dëmtimin e imazhit të punëtorëve shëndetësorë, duke ia rikujtuar se i njëjti ka qenë edhe kandidat për deputet nga radhët e LDK-së.
“Ju bëjmë me dije për herë të parë dhe të fundit se, Z. Fitim Havolli ish kandidat për Asamble Komunale Prishtinë dhe ish- kandidat për deputet të LDK-së në zgjedhjet e 6 Tetorit 2019 i cili ka dështuar në politikë dhe tani kinse po merret me të drejtat e komunitetit infermieror, kërkojmë nga ky zotëri dhe seksioni i tij sindikal që të rri larg nga të drejtat e infermierëve sepse janë duke i dëmtuar në masë të madhe me veprimet e tyre me apo pa dije”, thuhet në reagimin e FSShK-së.
Ky është reagimi i plotë i FSShK-së:
Reagim publik i FSSHK-së ndaj deklarimeve të Z. Fitim Havolli në konferencën e mbajtur me datë 01.07.2020
Federatat e Sindikatave të Shëndetësisë së Kosovës e pranuar ndërkombëtarisht në EPSU(Europian Public Service Union) dhe PSI( Public Service International) e cila në ombrellën e saj ka 50 Sindikata dhe seksione sindikale të shtrira në të tre nivelet e sektorit publik të shëndetësisë, nga numri i përgjithshëm i të punësuarve 13.180(ASK-2018) ku rreth 11 500 punëtorë shëndetësor janë anëtar të FSSHK-së të deklaruar vullnetarisht, ku bazuar në nenin 17 të Ligjit për Organizimin Sindikal është Federatë reprezentuese e cila i përfaqëson punëtorët shëndetësor në të gjitha institucionet duke i mbrojtur të drejtat e tyre ligjore si dhe duke i siguruar benefite shtesë përmes Kontratës Kolektive Sektoriale si të drejta më të avancuara nga Ligji i Punës.
Kjo Federatë ka përfaqësuar denjësisht punëtorët shëndetësor gjatë përpilimit të Ligjit të Pagave, për të gjitha kategoritë pa dallim, prandaj jua bëjmë me dije për herë të parë dhe të fundit se, Z. Fitim Havolli ish kandidat për Asamble Komunale Prishtinë dhe ish- kandidat për deputet të LDK-së në zgjedhjet e 6 Tetorit 2019 i cili ka dështuar në politikë dhe tani kinse po merret me të drejtat e komunitetit infermieror, kërkojmë nga ky zotëri dhe seksioni i tij sindikal që të rri larg nga të drejtat e infermierëve sepse janë duke i dëmtuar në masë të madhe me veprimet e tyre me apo pa dije.
Sa për dijeni të këtyre individëve dashakeq ju bëjmë me dije se organet më të larta të FSSHK-së siq janë Këshilli Drejtues dhe
Kryesia e FSSHK-së përbëhet nga rreth 70% të infermierëve, kështu që deklaratat e tilla se infermierët nuk janë të përfaqësuar janë të pavërteta dhe të pakuptimta.
Ju bëjmë me dije këtyre individëve dhe opinionit të gjerë se shfuqizimi i Ligjit mbi Paga nga ana e Gjykatës Kushtetuese është bërë duke u thirrur në ankesat tuaja, është shumë e pavërtetë,sepse në asnjë pikë të arsyetimit të Aktgjykimit me nr. KO 219/19 nuk përmendet punëtori shëndetësor, prandaj mos e dezinformoni opinionin me të pavërteta.
Në fund ju njoftojmë se FSSHK është duke zhvilluar takime me instancat më të larta shtetërore me qëllim të gjetjes së një zgjidhje urgjente deri në plotësim ndryshimin e Ligjit të Pagave.
Dhe apelojmë tek punëtorët shëndetësor të qëndrojnë UNIK dhe mos të bijnë pre e manipulantëve dhe protagonistëve të ndryshëm.
